В Атырау +4 
Қазақстанның Энергетика министрі Ерлан Ақкенженов қанша жалақы алатынын және коммуналдық қызметтерге қанша төлейтінін айтты. Белгілі болғандай, ведомство басшысы Астанадағы беделді Highvill тұрғын үй кешенінде тұрады. Ол коммуналдық қызметтерге ай сайын 75 мың теңгеге дейін төлейді, ал жалақысы шамамен 1,2 миллион теңгені құрайды.
Бұл туралы Ақкенженов 10 қарашада Үкімет отырысынан кейін өткен брифингте журналистердің коммуналдық қызметтердің құны мен тарифтердің өсуіне қатысты сұрақтарына жауап беру кезінде айтты, деп хабарлайды Informburo.kz.
«Мен шамамен 73–75 мың теңге төлеймін. Highvill тұрғын үй кешенінде тұрамын. Коммуналдық қызметтерге ай сайын осындай соманы жұмсаймын», — деді министр.
Сонымен қатар оның айтуынша, бұл сомаға интернет ақысы мен бөлек жалға алатын автотұрақ орнының төлемі кірмейді.
Журналистер Энергетика министрі жалақысының мөлшерін де сұрады.
«Менің жалақым шамамен 1 миллион 200 мың теңге. Бұл — мемлекет төлейтін сома. Есеп-қисабын өздеріңіз жасай аласыздар деп ойлаймын», — деп жауап берді Ақкенженов.
Осылайша, министр интернет пен автотұрақ ақысын есептемегенде, ай сайынғы жалақысының шамамен 6,1–6,3 пайызын коммуналдық қызметтерге жұмсайды.
Сол брифингте министр электр энергиясы тарифтерінің өсуіне де түсініктеме берді. Оның айтуынша, қосымша қаражат жабдықтарды жөндеуге, энергетиктердің жалақысын көтеруге және электр станцияларының сенімді жұмысын қамтамасыз етуге бағытталады.
Ақкенженовтің хабарлауынша, 2026 жылы жоспарланған тоғыз энергоблоктың сегізінде және 55 қазандықтың 49-ында жөндеу жұмыстары аяқталған. Электр станцияларын қаржыландыру көлемі былтырғы 348 миллиард теңгеден биыл 384 миллиард теңгеге дейін өскен.
Сонымен бірге Энергетика министрлігінің басшысы ведомство қазіргі уақытта электр энергиясы тарифтерін одан әрі көтеру туралы бастама көтеруді жоспарлап отырған жоқ екенін мәлімдеді.