В Атырау -2.1 
Маңғыстау облысында әкімдікке келген әйел ғимараттың кіреберісіндегі өткізу бекетінде болған пышаққа қатысты оқиғадан кейін 86 500 теңге айыппұл төледі. Алдын ала мәлімет бойынша, күзет қызметкерлері одан үшкір әрі кесетін затты алып қоюға әрекеттенген кезде әйел қолын кесіп алған.
Оқиға 6 қарашада болған. Алайда бұл туралы ақпарат әлеуметтік желілерде тек 9 қарашада пайда болды, деп хабарлайды Lada.kz.
Бұл туралы қоғам белсендісі әрі блогер Диляра Турина мәлімдеді. Оның айтуынша, әйел Маңғыстау облысы әкімдігінің ғимаратына шағын пышақ алып келген. Күзет қызметкерлері затты тәркілеуге әрекеттенген кезде келуші әйел жеңіл жарақат алған.
Жәбірленушіге медициналық көмек көрсетілді. Кейін оған қатысты ҚР Әкімшілік құқық бұзушылық туралы кодексінің 434-бабы — ұсақ бұзақылық бойынша әкімшілік хаттама толтырылды.
Маңғыстау облыстық полиция департаменті оқиға болғанын растады және істің сотта қаралғанын хабарлады. Әйел әкімшілік құқық бұзушылық жасағаны үшін кінәлі деп танылып, оған 20 АЕК немесе 86 500 теңге көлемінде айыппұл салынды.
Сонымен қатар полиция әйелдің қандай жағдайда қолын кесіп алғанын егжей-тегжейлі түсіндірмеді. Сондай-ақ оның мемлекеттік мекемеге пышақты не үшін алып келгені және ұсақ бұзақылық бойынша жауапқа тартылуына нақты қандай әрекеттері негіз болғаны белгісіз.