В Атырау -2.1 
Қазақстан премьер-министрі Олжас Бектенов барлық өңірдің әкімдіктеріне қысқы жағдайда жұмыс істеу үшін апаттық бригадалар мен арнайы техниканы шұғыл жұмылдыруды тапсырды. Үкімет отырысында қатаң сынға себеп болған мәселе – қазақстандықтардың үйлеріндегі суыққа қатысты жаппай шағымдары.
Ресми мәлімет бойынша, еліміздің барлық өңірінде жылыту маусымы белгіленген кестеге сай басталған. Жазда коммуналдық қызметтер жылу желілері мен электр станцияларын ауқымды жөндеуден өткізді. Алайда кейбір қалалардағы нақты жағдай есептерде көрсетілген мәліметтерден алшақ болып шықты.
Қай қалаларда жылу мәселесі туындады?
Үкімет басшысының айтуынша, ел тұрғындарынан жылудың сапасыз берілуіне немесе оның жиі өшірілуіне байланысты шағымдар түсіп жатыр. Қазір жағдай әсіресе үш қалада күрделі:
Ақтау
Павлодар
Петропавл
Премьер-министр әкімдерден жұмысты дереу қолға алып, тұрғындардан түскен әрбір шағымға жедел ден қоюды талап етті. Бұл ретте мектептер, ауруханалар және басқа да әлеуметтік нысандарға басымдық берілуі тиіс.
«Өңір әкімдеріне аймақтық штабтардың жұмысын жандандырып, тұрғындардың шағымдарына жедел ден қоюды тапсырамын. Қысқы жағдайда жұмыс істеу үшін апаттық бригадалар мен арнайы техниканы жұмылдыру қажет. Сондай-ақ әкімдіктер халыққа көмірдің тұрақты бағамен қолжетімді болуын үнемі бақылауда ұстауы тиіс», – деп атап өтті Олжас Бектенов.
Балалар сабаққа күртеше киіп отыруға мәжбүр
Премьер-министрдің сөзін растайтын жағдай көп күттірмеді. Сол Ақтауда №20 және №23 мектептердің оқушылары батареялар суық болғандықтан, сабақ кезінде сырт киімдерін шешпей отыруға мәжбүр. Ата-аналар дабыл қағып жатыр: балалар жаппай ауыра бастаған.
Жағдайдың күрделілігі – екі оқу орны да оқу жылы басталғанға дейін ресми дайындық паспорттарын алған. Қалалық білім бөлімінің мәліметінше, мектептердің ішкі жылу желілері жарамды, ал ақау сыртқы жылу желілерінде болған. Жылу тасымалдағышы ғимараттарға қажетті көлемде жетпей отыр. Әкімдік пен қызмет көрсетуші «КЖСА» компаниясы апатты жағдайды жойып, сыныптарға жылуды «жақын арада» беруге уәде етті.
Жөндеу жұмыстары мен жауапты тұлғаларды бақылау
Энергетика министрлігіне өңірлермен бірлесіп, жылу электр орталықтарындағы қалған жөндеу жұмыстарын кідіріссіз аяқтау және апат болған жағдайда пайдаланылатын қажетті жабдық қорын қалыптастыру тапсырылды.
Еліміздің барлық өңірінде жылыту маусымының өтуін жеке бақылау және жалпы үйлестіру міндеті Премьер-министрдің бірінші орынбасары Нұрлыбек Нәлібаевқа жүктелді.