В Атырау +3.9 
Атырау қалалық соты мемлекеттік мекемеден заңсыз босатылған жұмыскердің құқығын қорғап шықты. Сот жұмыс берушінің еңбек заңнамасын бұзғанын анықтап, азаматты бұрынғы лауазымына қайта орналастыруға және бос жүрген уақыты үшін жалақысын толық өндіріп беруге шешім шығарды.
Іс материалдарына сәйкес, талап қоюшы К. мемлекеттік мекемеде аккомпаниатор болып еңбек еткен. Алайда 2025 жылғы тамызда өткен ішкі іріктеу хаттамасына сүйенген жұмыс беруші оның «дауыс қою деңгейі жеткіліксіз» және «музыкалық білімі төмен» деген ескертулерді негіз етіп, Еңбек кодексінің 52-бабы 1-тармағы 6-тармақшасы мен 49-бабы 1-тармағы 3-тармақшасы бойынша еңбек шартын бұзған.
Жұмыстан босату туралы бұйрықпен келіспеген азаматша өз құқығын қорғау үшін сотқа арызданды. Ол бұйрықты заңсыз деп тануды, қызметіне қайта тұруды және мәжбүрлі түрде бос жүрген уақыты үшін орташа жалақысын өндіруді талап етті.
Сот істі қарау барысында жұмыс берушінің заң нормаларын бұрмалағанын анықтады:
Аттестаттаудың болмауы: Заң бойынша жұмыскерді біліктілігінің жеткіліксіздігіне байланысты босату үшін (Еңбек кодексінің 52-бабы 1-тармағы 4-тармақшасы) арнайы аттестаттау жүргізіліп, оның қорытындысы ресми түрде расталуы тиіс еді.
Негізсіз айып: Ұйымда өткізілген ішкі іріктеу заңды аттестаттау рәсімін алмастыра алмайды. Соған байланысты жұмысшының мамандығына сәйкес келмейтіні туралы дәлелдер заңды түрде расталмаған болып шықты.
Нәтижесінде Атырау қалалық сот мекеменің әрекетін заңсыз деп тапты. Талап арыз толық көлемде қанағаттандырылып, еңбек шартын бұзу туралы бұйрықтың күші жойылды. Аккомпаниатор бұрынғы орнына қайта алынып, оған жұмыссыз жүрген барлық кезең үшін жалақысы өндірілетін болды.
Сот актісі заңды күшіне енді.