В Атырау +15.6 
Алматыда бұрынғы полиция қызметкері Серік Накимов азаматтық некедегі әйелін аса қатыгездікпен өлтіргені үшін 15 жылға бас бостандығынан айырылды.
Ер адам 34 жастағы әйелге үш кішкентай баласының көзінше пышақпен 39 рет жарақат салған, деп хабарлайды КТК телеарнасы.
Қайғылы оқиға 2025 жылғы 3 мамырда Алматының Наурызбай ауданындағы Шұғыла шағынауданындағы көпқабатты үйлердің бірінде болған. Бұған дейін «Ақ Жайық» басылымы марқұмның Ұзынағаш ауылындағы мектеп директоры болып жұмыс істегенін хабарлаған. Оның қылмыс жасалған кезде 39 жаста болған азаматтық некедегі күйеуі бұған дейін Алматы облысының полициясында қызмет еткен, алайда теріс себептермен жұмыстан шығарылған.
Тергеу мәліметінше, бірге тұрған ерлі-зайыптының арасында жанжал туындап, сол кезде ер адам әйелге пышақпен шабуыл жасаған. Оқиға олардың үш баласының көзінше болған. Айқай-шуды естіген көршілері полиция мен жедел жәрдем шақырған. Алайда оқиға орнына жеткен дәрігерлер әйелдің қайтыс болғанын ғана растаған. Шабуылдан кейін Накимов мойны мен ішіне пышақ жарақатын салып, өзіне қол жұмсамақ болған. Оны оқиға орнында ұстап, ауыр жағдайда ауруханаға жеткізген.
Сот отырысы барысында айыпталушы қылмысты аффект жағдайында жасағанын, ал болған жайтты тек ауруханаға түскеннен кейін ғана түсінгенін мәлімдеген. Алайда сот полиция қызметкерлерінің айғақтарын да ескере отырып, бұл нұсқаны қабылдамады.
Серік Накимов аса қатыгездікпен кісі өлтіргені үшін кінәлі деп танылып, орташа қауіпсіздік мекемесінде жазасын өтеу шартымен 15 жылға бас бостандығынан айырылды. Сонымен қатар ол марқұмның отбасына моральдық зиян үшін 10 миллион теңге өтемақы төлеуге міндеттелді.
Марқұмның туыстары бұдан да қатаң жаза талап еткендеріне қарамастан, сот шешіміне көңілдері толатынын айтты.
«Үкімге көңілім толады, дегенмен мен өмір бойына бас бостандығынан айыруды сұраған едім. Аллаға шүкір. Осыған да рақмет», – деді марқұмның туысы КТК тілшілеріне.