В Атырау +15.6 
Қазақстан Президенті Қасым-Жомарт Тоқаев «Халықтық құрылыс» ауқымды бастамасын жүзеге асыру болашақ ұрпаққа маңызды әрі шын мәнінде салмақты мұра қалдыруға мүмкіндік беретінін мәлімдеді. Мемлекет басшысы бұл туралы Network School негізін қалаушы Баладжи Шринивасанмен кездесуі кезінде айтты.
Президенттің айтуынша, Қазақстан жаңа буын технологиялық көшбасшыларын даярлау мақсатында білім беру, ғылым және цифрлық құзыреттерді дамытуға белсенді инвестиция салып жатыр. Осы орайда Тоқаев бүкіл ел бойынша әлеуметтік инфрақұрылым нысандарын ауқымды түрде салуды көздейтін «Халықтық құрылыс» бағдарламасы туралы айтты.
Бастама аясында жаңа мектептер, университеттер, медициналық мекемелер және басқа да әлеуметтік маңызы бар нысандар салу жоспарланып отыр. Мемлекет басшысы атап өткендей, бұл жобалар Қазақстанның дамуына және халықтың өмір сүру сапасын жақсартуға ұзақ мерзімді үлес қосуға тиіс.
Кездесу барысында елдің технологиялық экожүйесін дамыту мәселелері де талқыланды. Тоқаев Network School Kazakhstan жобасының Астанада іске қосылуын құптап, оның қазақстандық университеттермен, стартаптармен және технологиялық компаниялармен ынтымақтастығын кеңейтуге мүдделі екенін білдірді.
Баладжи Шринивасан Network School Kazakhstan жобасын дамытудың цифрлық шешімдерді енгізуге, мамандар даярлауға және инновацияларды қолдауға қатысты басым бағыттарын таныстырды. Сондай-ақ Президент оны Astana AI Film Festival кинофестиваліне инвестициялық қолдау көрсеткені үшін алғыс білдірді.
Кездесу қорытындысы бойынша Қасым-Жомарт Тоқаев Баладжи Шринивасанды Қазақстанда жасанды интеллект пен инновацияларды дамытуға қосқан үлесі үшін II дәрежелі «Достық» орденімен марапаттады.