В Атырау +15.6 
Қазақстанда «Дипломмен – ауылға!» бағдарламасы бойынша тұрғын үй кредитін алған 11 853 маман кейін ауылдық жерлерден көшіп кеткен немесе бағдарлама талаптарын мерзімінен бұрын бұзған. «Ауыл» партиясы фракциясының депутаттары Үкіметке ауылдарда жас кадрларды тұрақтандыру тәсілдерін қайта қарауды ұсынды.
Премьер-министр Олжас Бектеновтің атына жолданған депутаттық сауалда уәкілетті органның деректері келтірілген. Оған сәйкес, тұрғын үй кредитін 55 237 маман алған. Олардың 95,4%-ы үш жыл жұмыс істеу міндеттемесін орындаған, ал 43 384 адам немесе 82,3%-ы ауылдық жерде тұрып, еңбек етуін жалғастырған.
Сонымен қатар 9 321 маман міндетті жұмыс мерзімі аяқталғаннан кейін ауылдан көшіп кеткен, тағы 2 532 адам бағдарлама шарттарын мерзімінен бұрын бұзған. Депутаттар мемлекет бағдарламаға қатысушылардың бес жылдан кейін қаншасы ауылда жұмысын жалғастырып жатқанын қадағаламайтынына назар аударды. Ал 2026 жылы тек тұрғын үй кредиттеріне 25 млрд теңге қарастырылған.
Мәселені шешу үшін «Ауыл» фракциясы «Туған жерге – жас маман» тетігін енгізуді ұсынып отыр. Оның аясында әкімдіктер жұмыс берушілермен бірлесіп, алдағы үш жылға аудандардың кадрларға қажеттілігін анықтап, студенттерді бос жұмыс орындары, инвестициялық жобалар мен жұмысқа орналасу мүмкіндіктері туралы алдын ала хабардар етуі керек.
Сондай-ақ депутаттар білім алуға, жұмыс іздеуге және баспана сатып алуға көрсетілетін қолдауды бір жүйеге біріктіруді ұсынады. Нәтижелерді бағалау үшін түлектер мен бағдарламаға қатысушылардың бір, үш және бес жылдан кейін ауылдық жерде қаншасы қалғанын бақылауға мүмкіндік беретін бірыңғай цифрлық жүйе құруды жақтайды.
Өтініш авторлары бұл бастаманы 2029 жылдың соңына дейін шамамен 6,5 трлн теңге бағыттау жоспарланған «Халықтық құрылыс» инфрақұрылымдық бағдарламасының алдағы іске асырылуымен байланыстырады. Олардың пікірінше, жаңа нысандарды салу және мекемелердің кейінгі жұмысын қамтамасыз ету үшін мамандарды алдын ала даярлау қажет.
Сонымен бірге депутаттар жаңа мемлекеттік бағдарлама құруды немесе қосымша қаржы бөлуді ұсынбайтынын атап өтті. Әңгіме жас мамандар ауылға міндетті үш жылдық жұмыс мерзімін өтеу үшін ғана келмей, онда ұзақ уақыт тұрақтап қалуы үшін қолданыстағы қолдау шараларының тиімділігін арттыру туралы болып отыр.