В Атырау +15.6 
Қазақстанда тұрмыстық зорлық-зомбылық пен қудалаудан зардап шеккендер агрессорлардан жасырынатын, жаяу жетуге болатын қауіпсіз PANA «сенім нүктелерінің» ауқымды желісін құру ұсынылды. Мұндай бастаманы Құрылтай депутаты Лариса Ли көтерді.
Депутаттың пікірінше, қолданыстағы қорғау тетіктері көбіне оқиғадан кейін ғана іске қосылады. Ал қауіп төнген сәтте адамның құтылып кетуіне санаулы минуттар ғана беріледі.
«Есеңгіреп қалған, телефоны мен ақшасы жоқ адам хаттама толтыру үшін алыстағы полиция бөлімшесіне жүгіріп бармайды. Егер бірден жасырынатын жер болмаса, жәбірленуші тығырықта қалады», — деп атап өтті Лариса Ли.
PANA жобасы аясында қарапайым дәріханалар, үй жанындағы дүкендер, КСК және МИБ кеңселері базасында қауіпсіз орындар желісін құру көзделіп отыр. Мұндай орындардың есігінде арнайы геолокациялық белгі болады.
«Үш қадам» хаттамасы қалай жұмыс істейді:
PANA белгісін көрген әйел немесе бала ғимаратқа кіріп, паналай алады;
Қызметкерлер нұсқаулыққа сәйкес зардап шеккен адамды бірден қызметтік бөлмеге апарып, агрессордың жолын бөгейді;
Қызметкерлер алғашқы көмек көрсетіп, шұғыл қызметтерді шақырады.
Депутаттың айтуынша, жобаны жүзеге асыру үшін бюджеттен «бірде-бір теңге» бөлудің қажеті жоқ. Өйткені бастама кәсіпкерлер мен қала тұрғындарының қолданыстағы инфрақұрылымын пайдалануға негізделген.
Бұл бастаманы Ішкі істер министрлігі толық қолдаған. Мұндай нүктелердің қызметкерлеріне полицияның қоғамдық көмекшілері деген ресми мәртебе беріледі, ал ғимараттарда бейнебақылау жүйесі бар тұрақты бекеттер ұйымдастырылады.
PANA жобасын пилоттық режимде Астана, Көкшетау және Теміртау қалаларында іске қосу жоспарланып отыр. Осы мақсатта депутат прокуратураны, ІІМ мен дағдарыс орталықтарын біріктіретін FSM Social цифрлық платформасына жобаға қолжетімділік беруді талап етті.