В Атырау +15.6 
Қазақстан QS Asia University Rankings 2027 беделді халықаралық рейтингіне енген университеттер саны бойынша жаңа рекорд орнатты. Тізімге Қазақстанның 51 жоғары оқу орны енді. Бұл өткен жылмен салыстырғанда жеті университетке көп. Еліміздің үш университеті Азиядағы үздік 100 оқу орнының қатарына кірді.
Рейтинг нәтижелерін 3 қарашада халықаралық талдау агенттігі QS Quacquarelli Symonds жариялады. Зерттеуге Азияның 26 елі мен аумағынан 1722 университет қатысты. Қазақстан тізімге енген оқу орындарының саны бойынша оныншы орынға ие болып, Орталық Азия елдері арасындағы көшбасшылық орнын сақтап қалды.
Қазақстанның үздік жоғары оқу орны — әл-Фараби атындағы Қазақ ұлттық университеті. Ол 46-орынға тұрақтады. Л. Н. Гумилев атындағы Еуразия ұлттық университеті 62-орынға, ал Satbayev University 89-орынға орналасты. Қазақстан рейтингтің үздік жүздігіне үш университетін енгізген Орталық Азиядағы жалғыз ел атанды.
Назарбаев Университеті де айтарлықтай өсім көрсетті. Ол бірден 62 сатыға көтеріліп, 201-орыннан 139-орынға жайғасты. Сонымен қатар рейтингке бұған дейін қатысқан қазақстандық жоғары оқу орындарының басым бөлігі өз позицияларын төмендеткен: 44 университеттің 24-і төмендесе, 14-і жоғарылаған, ал алтауы бұрынғы орнын сақтап қалған. Мәселен, әл-Фараби атындағы ҚазҰУ бір жыл ішінде 38-орыннан 46-орынға түсті.
Атырау университеті халықаралық рейтингке алғаш рет енді
Халел Досмұхамедов атындағы Атырау университетінің нәтижесі ерекше назар аудартады. Оқу орны QS Asia University Rankings рейтингіне алғаш рет еніп, 1001–1100 орындар аралығынан көрінді.
Рейтингте Махамбет Өтемісов атындағы Батыс Қазақстан университеті де алғаш рет пайда болып, осы топқа орналасты. Жалпы, рейтингке Қазақстанның жеті жоғары оқу орны алғаш рет қосылды.
Ғылым және жоғары білім министрлігінің мәліметінше, соңғы үш жылда Қазақстанның Азия рейтингіндегі өкілдігі 34 университеттен 51 университетке дейін артқан.
QS рейтингті жасау кезінде академиялық бедел, түлектердің жұмыс берушілер арасындағы сұранысы, ғылыми қызмет, оқытушылар мен студенттер арақатынасы, халықаралық ынтымақтастық және академиялық ұтқырлықты қоса алғанда, 11 көрсеткішті ескереді.
Сонымен қатар сарапшылар қазақстандық университеттер ғылыми зерттеулердің халықаралық маңызын арттыруы қажет екенін атап өтеді. Ғылыми жарияланымдардың дәйексөз келтірілу көрсеткіші бойынша Қазақстан Орталық Азиядағы орташа деңгейден айтарлықтай артта қалып отыр.