В Атырау +5.1 
Қазақстан мен Өзбекстан шекарасында халықаралық жүк тасымалына арналған электронды кезекке брондау ережелері өзгереді. Бұл туралы Түркістан облысы бойынша Мемлекеттік кірістер департаменті хабарлады.
Өзгерістер 2026 жылғы 9 қарашадан бастап күшіне енеді және «Қазығұрт», «Б. Қонысбаев» және «Атамекен» өткізу пункттеріне қатысты болады.
Кепілдік жарнасы не үшін енгізіледі?
Жаңа талаптың басты мақсаты — өткізу пункттеріндегі жасанды кептелістер мен «жалған» броньдарды жою. Мұндай жағдайларда тасымалдаушылар белгілі бір уақытқа орын брондап, бірақ белгіленген уақытта келмейді.
Енді электронды кезек жүйесінде орын брондау үшін тасымалдаушы 20 АЕК мөлшерінде кепілдік жарнасын (2026 жылы 86 500 теңге) төлеуі керек.
Қаражат қалай ұсталады және қайтарылады?
Шоттағы қажетті қаражат: орын брондау үшін тасымалдаушының арнайы электрондық шотында кемінде 20 АЕК (86 500 теңге) болуы қажет.
Қаражат толық қайтарылады: егер жүк көлігі өткізу пунктіне брондалған уақытта дәл келсе, кепілдік төлем автоматты түрде толық көлемде қайтарылады.
Келмегені үшін айыппұл: егер тасымалдаушы 90 күн ішінде қатарынан екі рет брондалған уақытында өткізу пунктіне келмесе, қаражат қайтарылмайды және мемлекеттік бюджет кірісіне аударылады.
Мемлекеттік кірістер департаментінің мәлімдемесі
Түркістан облысы бойынша Мемлекеттік кірістер департаменті халықаралық жүк тасымалына қатысушыларды сапарларын алдын ала жоспарлап, арнайы шоттарындағы қаражат қалдығын бақылауға шақырды.
«Жаңа талаптарды сақтау өткізу пункттеріндегі жүк ағынын реттеуге және шекараның өткізу қабілетін тиімді пайдалануға мүмкіндік береді», — деп атап өтті ведомство.