В Атырау +7.7 
Қазақстандықтар ескі автокөліктері мен ауыл шаруашылығы техникасын қайта өңдеуге тапсырып, оның орнына отандық жаңа көлік сатып алуға жеңілдік сертификатын қайтадан ала алады. Экология министрлігі тиісті қағидаларды бекітті, деп хабарлайды Свидетель.kz арнасына сілтеме жасап.
Бағдарлама жеке және заңды тұлғаларға қолданылады. Негізгі талап — техника бұған дейін Қазақстанда тіркелген және кәдеге жарату үшін ресми түрде есептен шығарылған болуы керек.
Жүрмейтін көлікті тапсыруға бола ма?
Автокөліктің шығарылған жылы мен техникалық жағдайы маңызды емес — қозғалтқышының іске қосылуы міндетті емес. Алайда көлік зауыттық жиынтықта толық болуы керек: шанағы, есіктері, дөңгелектері, қозғалтқышы, беріліс қорабы, аккумуляторы және радиаторы болуы тиіс. Егер кейбір бөлшектері (мысалы, стартері немесе генераторы) алынып тасталса, оларды салонға немесе жүксалғышқа салып қоюға рұқсат етіледі.
Қағидалар тракторлар мен комбайндарға да қолданылады. Олардың жиынтықталу талаптары техниканың салмағына байланысты белгіленеді.
Жеңілдік сертификаты қалай жұмыс істейді?
Жеңілдік мөлшері: Қағидаларда белгіленген нақты сома жоқ. Бағдарлама операторы — «Жасыл даму» АҚ — кәдеге жарату төлемдерінен түсетін қаражат есебінен сертификаттардың номиналын және олардың сандық лимиттерін жыл сайын белгілеп отырады.
Қайда пайдалануға болады: Сертификат Қазақстанда өндірілген жаңа автокөлікті немесе ауыл шаруашылығы техникасын сатып алуға жеңілдік алуға құқық береді.
Біріктіру мүмкіндігі: Бір жеңіл автокөлік сатып алған кезде екі сертификатқа дейін, ал арнайы техника сатып алғанда төрт сертификатқа дейін біріктіруге болады.
Қайта сату: Сертификаттың жарамдылық мерзімі — 1 жыл. Оны басқа тұлғаларға беруге немесе қайта сатуға болады, бірақ үш реттен артық емес.
Автокөліктерді қабылдаудың нақты басталу күндері мен жинау пункттерінің мекенжайларын оператор жақын уақытта өз ресурстарында жариялауға уәде берді.