В Атырау +17 
Қазақстандық кеденшілер арасында сыбайлас жемқорлық деңгейі бойынша ең проблемалы бағыт — Өзбекстанмен шекара. Қытаймен шекарадағы өткізу пункттерінде де заңбұзушылықтар мен парақорлық фактілері тұрақты түрде тіркеліп келеді. Бұл туралы брифинг барысында ҚР Қаржы министрі Мәди Такиев мәлімдеді.
Журналистердің 2026 жылдың басынан бері кеден органдарының қанша қызметкері сыбайлас жемқорлық қылмыстары үшін жауапкершілікке тартылғаны туралы сұрағына жауап берген Қаржы министрлігінің басшысы нақты статистиканы айта алмады. Дегенмен ол бұл мәселенің бар екенін растады.
«Нақты сандарды атай алмаймын, бірақ мұндай фактілер бар. Олар Қазақстанның Өзбекстанмен шекарасында да, Қытаймен шекарасында да тіркеліп отыр. Бұл ретте заңбұзушылықтардың басым бөлігі Өзбекстан бағытында анықталады. Әңгіме, мысалы, шекарадан жылдам әрі кедергісіз өту үшін берілетін ақшалай сыйақылар туралы болып отыр. Қазір бұл бағытта тәртіп орнату бойынша белсенді жұмыс жүргізіп жатырмыз», — деді министр.
Мәди Такиевтің айтуынша, шекаралық бекеттердегі заңсыз алым-салықпен күресудің негізгі құралы жаппай цифрландыру болуы тиіс.
Атап айтқанда, проблемалы учаскелерде KazCargo жүйесі енгізіліп, оның қолданылу аясы кеңейтіліп жатыр. Бұл жүйе тасымалдаушыларға бағытты алдын ала жоспарлауға, электрондық кезектен орын брондауға және мемлекеттік шекарадан өту кезінде адами фактордың ықпалын азайтуға мүмкіндік береді.