В Атырау +16.2 
Қазақстанның Ішкі істер министрлігі Dodo Pizza IT-жүйесіне жасалған хакерлік шабуылға қатысы бар деген күдіктілердің арасында Қазақстан азаматы болғаны туралы ақпаратқа түсініктеме берді.
ҚР ІІМ Киберқылмысқа қарсы іс-қимыл департаментінің басқарма бастығы Бейбіт Біржанов 21 қазанда ОКҚ-да өткен брифингте Қазақстан азаматының ұсталғаны туралы ақпарат расталмайтынын мәлімдеді.
«Қолда бар ақпаратқа сәйкес, Қазақстан азаматының ұсталғаны расталмайды. Осыған байланысты азаматтарымызға қатысты ешқандай шара қолданылған жоқ. Бізге ешкім ресми түрде ұсталғаны туралы хабарлаған жоқ», — деді ІІМ өкілі.
Біржановтың айтуынша, болжамды қылмыс Ресей аумағында жасалғандықтан, тергеудің егжей-тегжейі Ресейдің құқық қорғау органдарының құзыретіне жатады.
Бұған дейін ресейлік БАҚ Telegram-дағы Baza арнасына сілтеме жасап, хакерлік шабуыл жасады деген күдіктілер тобы төрт адамнан тұрғанын хабарлаған. Үш адамның ұсталғаны, олардың арасында Ресей, Қазақстан және Беларусь азаматтары болғаны айтылған.
Dodo Pizza компаниясына кибершабуыл қыркүйек айының соңында жасалған. Компания оқиғаның болғанын растап, қаскөйлер клиенттер туралы ақпараттың бір бөлігіне, соның ішінде аты-жөніне, телефон нөмірлеріне, мекенжайларына және тапсырыстары туралы мәліметтерге қол жеткізуі мүмкін екенін хабарлаған.
Сонымен қатар желінің қолдау қызметі бұған дейінгі алдын ала мәліметтер бойынша, ақпараттың таралуы Қазақстандағы клиенттердің деректеріне әсер етпегенін мәлімдеген.