В Атырау +22 
Ақтөбе қаласының тұрғыны дәрігерлер жоқ сынықты ұзақ уақыт емдегені үшін жергілікті ауруханадан ақшалай өтемақы өндіріп алды. Бұл туралы Halyqstan Ақтөбе қаласының №3 сотының материалдарына сілтеме жасап хабарлады.
Өткен жылдың жазында әйел жол-көлік оқиғасына ұшыраған. Ауруханада оған «тобық буыны сүйектерінің сынуы» диагнозы қойылған. Соның салдарынан қала тұрғыны ұзақ уақыт амбулаториялық ем қабылдап, үнемі тексеруден өтуге мәжбүр болған. Сонымен қатар оның физикалық белсенділігі едәуір шектелген.
Кейін жүргізілген қайта сараптамалар жол-көлік оқиғасынан кейін жаңа сынық болмағанын көрсетті. Дәрігерлер бұрынғы жарақаттың салдарын жаңа жарақат деп қабылдаған.
Өз құқықтары бұзылды деп есептеген пациент сотқа жүгініп, медициналық ұйымнан моральдық зиян үшін 3 миллион теңге өтемақы өндіруді талап етті.
Сот талқылауы барысында рентген суреттерінің нәтижелерін дұрыс түсіндірмеу салдарынан әйелдің артық тексерулерден өтіп, ұзақ уақыт ем қабылдағаны анықталды. Бұдан бөлек, аурухана қарама-қайшы талдау нәтижелерін талқылау үшін дәрігерлер консилиумын уақытында ұйымдастырмаған.
Жіберілген заңбұзушылықтар мен талап қоюшының моральдық зардаптарын ескере отырып, сот талап арызды ішінара қанағаттандырып, медициналық мекемеден 300 мың теңге өндіріп алу туралы шешім шығарды.
Сот шешімі әлі заңды күшіне енген жоқ.