В Атырау +16.7 
Еңбек және халықты әлеуметтік қорғау министрлігінің дерегінше, елдегі кадр тапшылығы әсіресе денсаулық сақтау, өндіріс, құрылыс және IT салаларында қатты сезіліп отыр. Нарықтағы бұл теңсіздікті жою үшін мемлекет сұранысқа ие мамандықтар тізімін үш есеге жуық кеңейтті.
Денсаулық сақтау мен өндірістегі кадр тапшылығы
Қазіргі таңда медицина саласында маман тапшылығы ерекше айқын байқалады. Бос жұмыс орындары мен түйіндемелер санының арақатынасы мынадай:
Акушер-гинекологтар: 469 бос орнына небәрі 100 түйіндеме;
Педиатрлар: 448 бос орнына 139 түйіндеме;
Анестезиолог-реаниматологтар: 300 бос орнына 75 түйіндеме тіркелген.
Сонымен бірге онколог, неонатолог және эндокринолог дәрігерлеріне де сұраныс жоғары.
Өнеркәсіп пен инфрақұрылымның кеңеюіне байланысты жұмысшы және техникалық мамандықтарға да қажеттілік артып отыр. Жұмыс берушілер тарапынан білікті электриктер, механиктер, слесарьлар, дәнекерлеушілер, машинистер, құрылысшылар мен жүргізушілерге сұраныс үлкен. Сонымен қатар өндірістік процестерді автоматтандыру жөніндегі мамандар мен инженерлер тапшы.
Цифрландыру үрдісіне орай еңбек нарығында бағдарламалық қамтамасыз етуді әзірлеушілер мен жасанды интеллект құралдарын меңгерген IT-мамандар да жоғары бағаланады.
2035 жылға дейінгі болжам және кадр даярлау
Ұзақ мерзімді болжамға сәйкес, 2035 жылға дейін Қазақстан экономикасына 2,9 млн маман қажет болады. Оның жартысынан астамы – жұмысшы кәсіптерінің өкілдері.
Нарық қажеттілігін өтеу мақсатында 2026 жылы ең сұранысқа ие мамандықтар тізімі 51-ден 174-ке дейін ұлғайтылды. Жаңартылған тізімге инженерия, құрылыс, өңдеу өнеркәсібі, биотехнология, сондай-ақ жасыл және атом энергетикасы бағыттары енгізілді.
Бүгінде кадрларды жұмыс берушілермен бірлесіп даярлау жүйесі қолға алынған:
Дуальды оқыту: 552 колледждің 138 мың студентін қамтиды, бұл процесске 11 мыңға жуық кәсіпорын қатысуда;
Нысаналы тапсырыс: 43 мың студент жұмыс берушілердің тікелей тапсырысымен білім алуда.
Бұл формат білім алушыларға өндірісте тікелей тәжірибе жинақтап, оқуды аяқтаған соң бірден жұмысқа орналасуға мүмкіндік береді. Мамандығын ауыстырғысы келетін азаматтар үшін қысқа мерзімді қайта даярлау бағдарламалары да қарастырылған.
Еңбек нарығындағы талдау көрсеткендей, елдегі кадр тапшылығы мамандардың жалпы жетіспеушілігінен емес, қолда бар біліктіліктің нарық талаптарына сәйкес келмеуінен туындап отыр.