В Атырау +9.7 
Қазақстан Үкіметі бюджетте мұнайдың бір баррелінің базалық бағасын 70 доллар деңгейінде белгіледі. Алайда геосаяси шиеленістер мұнай бағасының жоғары деңгейде, яғни барреліне 80–90 доллар шамасында сақталуына ықпал етуі мүмкін. Мұндай пікірді экономист Сапарбай Жұбаев NEGE басылымының Decaf подкастында білдірді.
Еске салайық, Ұлттық экономика министрлігі 2027–2029 жылдарға арналған ел дамуының үш сценарийін әзірлеген:
Базалық сценарий (бюджетті жоспарлауға негіз болған): мұнай бағасы — барреліне 70 доллар, ЖІӨ өсімі — 5%-дан жоғары;
Оптимистік сценарий: мұнай бағасы — барреліне 85 доллар, ЖІӨ өсімі — 5,9%;
Пессимистік сценарий: мұнай бағасы — барреліне 50 доллар, ЖІӨ өсімі 3,2%-ға дейін баяулайды.
Сапарбай Жұбаевтың бағалауынша, әлемдік аренадағы тұрақсыздықтың сақталуына байланысты нақты жағдай оптимистік сценарийге жақын болуы мүмкін. Шикізат бағасының жоғары болуына негізгі шиеленіс ошақтары әсер етуді жалғастырады. Олардың қатарында Ресей мен Украина арасындағы қақтығыс, Таяу Шығыстағы текетірес, сондай-ақ АҚШ пен Қытайдың Тайваньға қатысты дауы бар.
«Ресей тарапынан жақын арада бейбіт келісімге қол жеткізіледі деп күтудің қажеті жоқ. Иран өз ұстанымын қатаң қорғайды, ал Вашингтон мен Бейжіңнің жақын болашақта Тайвань мәселесі бойынша ымыраға келуі екіталай», — деп атап өтті сарапшы.
Сонымен қатар экономист мұнай бағасының барреліне 60–70 долларға дейін төмендеу мүмкіндігін де жоққа шығармайды. Мұндай өзгеріс халықаралық қақтығыстардың бәсеңдеуі, Иранға салынған санкциялардың алынуы және Венесуэлада мұнай өндіру көлемінің артуы жағдайында орын алуы мүмкін.