В Атырау +14.9 
Қазақстан Республикасы Ұлттық қауіпсіздік комитеті заңсыз көші-қонға қарсы күрес аясында жүргізілген арнайы операция барысында жасырын әрекет еткен интернет-алаяқтар тобының қызметін тоқтатты. Қазақстанда заңнаманы өрескел бұза отырып жүрген Қытайдың 13 азаматы ұсталды.
Ұсталғандардан не тәркіленді?
Ведомствоның мәліметінше, шетелдіктер Қазақстан аумағында халықаралық алаяқтық схемасын ұйымдастырған. Тінту барысында олардан мыналар тәркіленді:
компьютерлік техника мен ұялы телефондардың ірі партиясы;
Starlink спутниктік интернетіне арналған жабдықтар жиынтығы;
криптовалюта әмияндарындағы қомақты қаражат.
Топтың қызметі шетелден үйлестіріліп отырған. Ал олардың алаяқтық әрекеттері басқа мемлекеттердің азаматтарына, яғни Қазақстан Республикасының резиденттері болып табылмайтын тұлғаларға қарсы бағытталған.
Халықаралық іздеуде болған
ҰҚК ұсталғандарды тексеруді Қытай Халық Республикасының Қоғамдық қауіпсіздік министрлігінің өкілдерімен бірлесіп жүргізген. Тексеру барысында олардың кейбірі өз елінде осыған ұқсас киберқылмыстар жасағаны үшін іздеуде жүргені анықталды.
2026 жылғы 16 қазанда шетелдік 13 азаматтың барлығы әкімшілік тәртіппен Қазақстаннан шығарылып, қылмыстық жауапкершілікке тарту үшін Қытайдың құқық қорғау органдарына тапсырылды.