В Атырау +21.7 
Қазақстанда пластикалық хирургтер орташа есептелген жалақы деңгейі бойынша 180-нен астам дәрігерлік мамандықтың ішінде екінші орынға ие болды.
Data Hub Ұлттық статистика бюросының деректеріне сілтеме жасап хабарлағандай, денсаулық сақтау және әлеуметтік қызмет көрсету кәсіпорындарына жүргізілген іріктемелі зерттеу қорытындысы бойынша, 2026 жылғы сәуірде пластикалық хирургтің орташа жалақысы 2 млн 146 мың теңгені құраған.
Бірінші орынды жақ-бет хирургтері иеленді. Олардың орташа есептелген жалақысы 2 млн 384 мың теңгеге жеткен.
Рейтингте орташа жалақысы 2 млн теңгеден асқан мамандықтар — осы екеуі ғана.
Үшінші орында орташа жалақысы 1 млн 256 мың теңгені құрайтын цитопатолог дәрігерлер тұр.
Одан кейін төтенше жағдайлар және апаттар медицинасының дәрігерлері — 864 мың теңге, балалар комбустиологтері — 833 мың теңге, функционалдық диагностика саласындағы кардиологтер — 821 мың теңге, рентгенохирургтер — 803 мың теңге, кардиохирургтер — 729 мыңнан 758 мың теңгеге дейін, ал ересектерге арналған ангиохирургтер 737 мың теңге жалақымен орналасқан.
Зерттеу авторлары нәтижелердің іріктеме құрылымына байланысты екенін атап өтеді. Кәсіпорын неғұрлым ірі болса, зерттеуге оның қызметкерлерінің соғұрлым аз бөлігі қамтылады. Мысалы, шамамен 5 мың қызметкері бар ұйымдарда әрбір жүзінші қызметкердің ғана деректері есепке алынуы мүмкін.
Бұл жағдай рейтингтің 2025 жылмен салыстырғанда күрт өзгеруін ішінара түсіндіреді. Былтыр ең жоғары жалақы алатын мамандар ретінде орташа табысы шамамен 1 млн теңге болған кардиохирургтер танылған еді. Ал пластикалық және жақ-бет хирургтері тіпті үздік 100 мамандықтың қатарына кірмей, орта есеппен 500 мың теңгеден аз жалақы алған.
Сондай-ақ мұнда есептелген жалақы туралы сөз болып отырғанын ескеру қажет. Яғни көрсетілген сомалардан салықтар мен басқа да міндетті төлемдер әлі шегерілмеген.