В Атырау +14.6 
Маңғыстау облысында дәрігерлер улы өрмекшінің шабуылына ұшыраған екі жасар баланың өмірін аман алып қалды. Бүлдіршін 10 күн бойы жансақтау бөлімінде өкпені жасанды желдету аппаратына қосылып жатқан. Бұл туралы Lada.kz хабарлайды.
Оқиға ойын кезінде болған. Алдын ала мәлімет бойынша, басқа бір бала қызға өрмекші берген, оны бүлдіршін жұтып қоюы мүмкін. Көп ұзамай баланың жағдайы күрт нашарлаған.
Аудандық ауруханадан науқас санитариялық авиация көмегімен шұғыл түрде облыстық балалар ауруханасына жеткізілген. Ауруханаға түскен кезде оның жағдайы аса ауыр деп бағаланып, бала бірінші дәрежелі комада болған.
«Дәрігерлер консилиум өткізіп, республикалық деңгейдегі мамандармен телеконсультациялар ұйымдастырды. Қарқынды терапия барысында балаға қарақұрт уына қарсы сарысу екі рет енгізілді», — деп хабарлады медициналық мекеме.
Баланың өмірі үшін тәулік бойы жүргізілген 10 күндік күрестен кейін оның жағдайы тұрақтанған. Бүлдіршін комадан шығып, өздігінен тыныс ала бастаған соң өкпені жасанды желдету аппаратынан ажыратылған.
Бейінді бөлімшеде тағы төрт күн ем қабылдағаннан кейін кішкентай науқас жағдайы қанағаттанарлық күйде үйіне шығарылды.
Дәрігерлер ата-аналарды барынша сақ болуға, серуен кезінде балаларын мұқият қадағалауға және оларға белгісіз жәндіктер мен жануарларға қол тигізуге ешқашан жол бермеуге шақырады.