В Атырау +21.3 
Құрылтай депутаты Марат Насибулов Премьер-министр Олжас Бектеновке қалалар мен ауылдық елді мекендердегі тұрғын орта сапасының бірыңғай стандартын қалыптастыру туралы ұсыныспен жүгінді.
Депутаттық сауалда тұрғын үй құрылысына баға беру кезінде билік көбіне пайдалануға берілген тұрғын үйдің шаршы метрі мен пәтерлер санына басымдық беретіні атап өтілген. Алайда депутаттың айтуынша, азаматтардың өтініштері мен Қазақстанның өңірлеріне барған «ЖСДП» өкілдерінің сапарлары жаңа үйлердің айналасында толыққанды инфрақұрылымның жиі болмайтынын көрсетеді.
Әңгіме балалар және спорт алаңдары, қарттар мен мүгедектігі бар адамдарға арналған демалыс орындары, аулаларды жарықтандыру, жаяу жүргіншілерге арналған сапалы жолдар мен көгалдандыру туралы болып отыр.
Депутаттың пікірінше, бұл мәселе әсіресе аудан орталықтары мен ауылдық елді мекендерде өзекті. Насибулов ауылдарға дәрігерлерді, мұғалімдерді, жас отбасыларды және басқа да мамандарды тарту кезінде мемлекет тек баспанамен ғана емес, бүкіл отбасыға қолайлы ортамен де қамтамасыз етуі керек екенін атап өтті.
Осыған байланысты депутат мемлекеттік және өзге де қаражат есебінен салынатын тұрғын үйлердің сапасына қойылатын бірыңғай ең төменгі стандарт енгізуді ұсынды.
Оның аясында құрылыс жобаларында абаттандыру элементтері міндетті түрде қарастырылуы тиіс. Олардың қатарында жарықтандыру, жаяу жүргіншілер жолдары, көгалдандыру, балалар және спорт алаңдары, сондай-ақ демалыс аймақтары бар.
Сонымен қатар мемлекет қаражаты есебінен бұрын салынған тұрғын үйлерді тексеріп, нақты орындалған жұмыстарды бекітілген жобалық-сметалық құжаттамамен салыстыру ұсынылды.
Депутаттың пікірінше, егер жоба бойынша балалар алаңы, көгалдандыру немесе жарықтандыру қарастырылса, бұл нысандар толық көлемде іске асырылуы керек.
Насибулов бірыңғай стандарт тек Астана мен облыс орталықтарына ғана емес, әр елді мекеннің ерекшеліктерін ескере отырып, аудандар мен ауылдарға да қолданылуы тиіс екенін ерекше атап өтті.
«Біз қалалық үлгіні ауылға сол күйінде көшіруді ұсынып отырған жоқпыз. Біз адамның лайықты өмір сүруіне қажетті бірыңғай базалық деңгейді белгілеуді ұсынамыз», — делінген депутаттық сауалда.
Депутаттың пікірінше, басты көрсеткіш салынған тұрғын үйдің шаршы метрі емес, тұрғындар үшін қалыптастырылған ортаның сапасы болуы керек.