В Атырау +17.3 
Dodo Pizza жүйелеріне ауқымды кибершабуыл жасаған халықаралық хакерлер тобының жолы кесілді. Құқық қорғау органдары төрт күдіктінің үшеуін ұстады. Олардың арасында Қазақстан азаматы да бар.
«База» Telegram-арнасының хабарлауынша, қылмыскерлердің ізіне түсуге олардың бірінің қарапайым қателігі көмектескен. Топ мүшелерінің бірі, Барнаул қаласының тумасы, 19 жастағы Д. Фридман ұрланған деректер қорына кіру кезінде өрескел қателік жіберген.
Белгілі болғандай, жас хакер өзінің «мансабын» Украина сайттарына шабуыл жасаудан бастаған. Кейін ол ірі компанияға шабуыл жасауға шешім қабылдаған. Бәріне ашық қолжетімділікте қалған осалдық себеп болған: GitHub платформасында компанияның ескі есептік жазба деректері жарияланған. Фридман сыбайластарымен бірге осы деректерді пайдаланып, компанияның өзара байланысты корпоративтік жүйелеріне енген. Осылайша, олар жабық бұлттық қоймаларға, дерекқорларға және қызметтік құпиясөздерге қол жеткізген. Топ құрамында Ресей, Қазақстан және Беларусь азаматтары болған.
Ақпараттың таралу ауқымы таңғаларлық. Сарапшылардың бағалауынша, хакерлер жалпы көлемі 3,7 ТБ болатын ақпаратты бақылауына алған. Бұл шамамен 33 миллиард жазбаға тең. Қаскөйлердің қолына соңғы 15 жылдағы 862 миллион тапсырыс туралы мәлімет, 68 миллион клиенттің профилі, компанияның 431 мың қызметкері туралы ақпарат, сондай-ақ жеткізу мекенжайлары көрсетілген 171 миллион жазба түскен.
Қазіргі уақытта киберқылмыстық топтың үш мүшесі ұсталды. Тергеу амалдары жалғасып жатыр.