В Атырау +25.1 
ExxonMobil Қашаған серіктестері мен Қазақстан үкіметі арасындағы 2,356 трлн теңге немесе шамамен $5,2 млрд мөлшеріндегі экологиялық айыппұл бойынша дауды реттеудің соңғы нұсқасына қарсы шықты.
Бұл туралы хабардар дереккөздерге сілтеме жасап Bloomberg хабарлайды.
Агенттіктің мәліметінше, Exxon келісімнің ұсынылған нұсқасын қолдамай, кейіннен бұған дейін бейтарап ұстанымда болған TotalEnergies компаниясын да қарсы шығуға көндірген. Бұл екі компанияның дауысы дауды реттеуді бұғаттауға жеткілікті болды.
Айыппұл Қазақстан билігінің Қашаған кенішінде күкіртті сақтауға қатысты шағымдарымен байланысты. Жобаға ExxonMobil мен TotalEnergies-тен бөлек Eni, Shell, «ҚазМұнайГаз», CNPC және Inpex қатысады.
Маусымда Атыраудағы сот экологиялық айыппұлды қолдады, ал шілдеде Қазақстанның Әділет министрлігі оны өндіріп алу процедурасын бастады. Бұл ретте NCOC серіктестері талаптарды халықаралық арбитражда даулауды жалғастырып жатыр және айыппұлды негізсіз деп санайтындарын мәлімдеп отыр.
Bloomberg сондай-ақ айыппұл төңірегіндегі дау ExxonMobil компаниясының Қазақстанмен Қашағанды кеңейту мүмкіндігі жөніндегі ауқымды келіссөздерінің бір бөлігіне айналғанын атап өтеді. Америкалық компания кеніштің игерілмеген бөлігін игеруге бағытталатын $80 млрд-қа дейінгі ықтимал инвестицияны қолданыстағы дауларды реттеу шартымен байланыстырады.