В Атырау +9 
Ktk.kz сайтының хабарлауынша, шетелдік жүргізуші куәлігі бар қазақстандықтар жүйелі мәселеге тап болған: мамандандырылған ХҚКО-ларда оларға жүргізуші куәлігін жай ғана ауыстырудан бас тартып, автомектепте қайта оқудан өтуге жіберіп жатыр. Алайда ІІМ-нің ресми ережелерінде қайта оқуды толық көлемде өту міндетті екені көрсетілмеген.
Мамандандырылған ХҚКО автомектепке жібереді, ал автомектеп толық курстан өтуді талап етеді
Мұндай жағдайға Ақтөбе қаласының тұрғыны Александр Гусев тап болған. Ол жүргізуші куәлігін 2021 жылы Санкт-Петербургте оқып жүрген кезінде алған. Құжатының жарамдылық мерзімі аяқталмаған. Алайда елге оралып, куәлігін ауыстыруға әрекет жасаған кезде оған бас тартылып, eOtinish платформасы арқылы автомектепте қайта оқудан өту қажеттігі туралы ресми жауап берілген.
Автомектептер мұндай тығырыққа тірелген жүргізушілердің өздеріне жиі жүгінетінін растайды. Сонымен қатар тәжірибелі жүргізушілерге арналған жеделдетілген бағдарламалар жоқ. Олар теория мен практиканың толық курсын қайта өтіп, медициналық тексеруден өтіп, 073 нысанындағы анықтаманы қайта алуға мәжбүр. Бұл процесс көп уақыт пен қаржыны талап етеді. Соның салдарынан көптеген азамат қоғамдық көлікке ауысуға мәжбүр.
Полицияның ресми ұстанымы
Алматы қалалық Полиция департаменті азаматтарды автомектепке қайта оқуға жіберу талабының заңсыз екенін атап өтті. Заңға сәйкес, Қазақстан Республикасы азаматтарының шетелдік жүргізуші куәлігін ауыстыру тәртібі нақты белгіленген және қайта оқуды немесе практикалық көлік жүргізу емтиханын қайта тапсыруды талап етпейді.
«Қазақстан Республикасы азаматының қолында Ресей Федерациясы берген жүргізуші куәлігі болса, автомектепте қайта оқудан өту талап етілмейді. Куәлікті ауыстыру үшін қажетті құжаттар топтамасын ұсынып, теориялық емтиханды сәтті тапсыру қажет», — деп түсіндірді Алматы қаласы Полиция департаментінің ресми өкілі Салтанат Әзірбек.
Мәселе неліктен туындады?
ІІМ мәселенің бар екенін мойындап, оны тексеру шараларының күшейтілуімен түсіндірді. Шетелде құжаттарды сатып алу және қолдан жасау жағдайларының жиілеуіне байланысты қазақстандықтардың өтініштері енді бірнеше кезең бойынша тексеріледі. Соның салдарынан жергілікті жерлерде өтініштерді қарау кезінде кідірістер мен сәйкессіздіктер туындап отыр.
«Қазіргі уақытта шетелдік жүргізуші куәлігін ауыстыру кезінде туындаған ақаулар қарастырылып жатыр. Бұл мәселе бойынша тиісті жұмыстар жүргізілуде», — деді Алматы қалалық Әкімшілік полиция басқармасының процессинг орталығының басшысы Нұрсұлтан Ақмұрзаев.
Әкімшілік полиция басқармасы Александр Гусевтің жағдайын жеке тәртіппен қарастыруға уәде берді. Егер оның құжаттарының түпнұсқалығы расталса, ол жақын арада теориялық емтихан тапсырып, қазақстандық жүргізуші куәлігін ала алады.