В Атырау +16.7 
Құрылтай Ресейден мұнай мен мұнай өнімдерін бажсыз тасымалдауды көздейтін үкіметаралық хаттаманы екі оқылымда қабылдады. Бұл шешім 2026 жылы ішкі нарықты отынмен қамтамасыз ету барысында ел қазынасы мен тұтынушыларға шамамен 30 миллиард теңге үнемдеуге мүмкіндік береді.
Қабылданған заң 2010 жылғы 9 желтоқсандағы екі ел үкіметтері арасындағы сауда-экономикалық ынтымақтастық туралы келісімнің қолданылуын қайта бастап, оған бірқатар өзгерістер енгізеді.
Құжатқа сәйкес, тараптар мұнай өнімдерін жеткізудің индикативті балансын жыл сайын өзара келісіп отырады. Сондай-ақ екі мемлекеттің құзыретті органдары арасында ақпарат алмасу тәртібі мен Ресейден отын түрлерін бажсыз импорттау мүмкіндігі толық сақталады.
Бажсыз режим Қазақстанның ішкі нарығындағы жанар-жағармай тапшылығын болдырмау үшін стратегиялық маңызға ие. 2026 жылға арналған болжам бойынша, баж салығынан босату есебінен мынадай қаражат үнемделеді:
Дизель отыны бойынша – 15,75 миллиард теңге;
Авиациялық отын бойынша – 8,61 миллиард теңге;
Бензин бойынша – 5,59 миллиард теңге.
Үкіметтегілер атап өткендей, бұл келісім мұнай өнімдерін тасымалдаудың халықаралық-құқықтық негізін нығайтып, ішкі нарықтағы баға тұрақтылығын сақтауға әрі Қазақстанның энергетикалық қауіпсіздігін қамтамасыз етуге бағытталған.