В Атырау +14.7 
Астана әкімдігі 1 желтоқсаннан бастап қоғамдық көлікте қолма-қол ақшасыз төлем жасаған кезде жол жүру ақысын 150 теңге деңгейінде белгілеуді ұсынды.
Қазір тариф 110 теңгені құрайды. Әкімдік 2014 жылы жол жүру ақысы 90 теңге болғанын және соңғы 12 жылда тарифтің тек бір рет қайта қаралғанын еске салды.
Тарифті көтерудің ықтимал себептерінің бірі — тасымалдаушылар шығындарының айтарлықтай өсуі.
Мәселен, әкімдік мәліметінше, дизель отынының бағасы 2014 жылы литріне 107 теңгеден қазіргі уақытта 329 теңгеге дейін өскен — яғни үш еседен астам.
Еңбек ақы төлеуге жұмсалатын шығындар да айтарлықтай артқан. Егер 2014 жылы жүргізушілердің жалақысы орта есеппен 100-150 мың теңге болса, қазір автобустың санаты мен жұмыс режиміне қарай 700 мың теңгеге дейін жетеді.
Бұдан бөлек, қосалқы бөлшектердің, автокөлік шиналарының, аккумуляторлардың бағасы, автобустарға техникалық қызмет көрсету мен жөндеу шығындары, сондай-ақ жаңа жылжымалы құрамның құны өскен.
Шығындардың артуына қарамастан, қалада қоғамдық көлікті жаңарту жұмыстары жалғасуда. Соңғы үш жылда тасымалдаушылар 1127 жаңа автобус сатып алған.
Әкімдік қолданыстағы тегін жол жүру жеңілдіктері сақталатынын да атап өтті.
Ұлы Отан соғысының қатысушылары мен мүгедектері және оларға теңестірілген тұлғалар, зейнеткерлер, көпбалалы аналар мен отбасылар, мүгедектігі бар адамдар, мүгедектігі бар балалар және олардың заңды өкілдерінің бірі, сондай-ақ саяси қуғын-сүргін құрбандарының жекелеген санаттары қоғамдық көлікте бұрынғыдай тегін жүре алады.
Сонымен қатар 2020 жылғы наурыздан бастап Астанада оқитын 18 жасқа дейінгі балалар үшін де тегін жол жүру қарастырылған.
Билік өкілдерінің айтуынша, 2026 жылы бір жолаушыны тасымалдаудың есептік құны қазіргі қолданыстағы тарифтен әлдеқайда жоғары.
Сондықтан 1 желтоқсаннан бастап қолма-қол ақшасыз төлем жасаған кезде жол жүру құнын 150 теңге деңгейінде белгілеу ұсынылып отыр. Түпкілікті шешім белгіленген тәртіппен қабылдануы тиіс.