В Атырау +14.7 
Қазақстан Президенті жанындағы ОКҚ-ның Дезинформацияға қарсы күрес орталығы Алматыдағы өртті Ресейде оба ауруы тіркелді деген қауесетпен байланыстыруға кейбір қолданушылардың әрекет жасап жатқанын мәлімдеді.
Алматы қаласының ТЖД мәліметінше, өрт екі қабатты әкімшілік ғимараттың екінші қабатында болған. Шамамен 20 шаршы метр аумақта тұрмыстық техника мен заттар жанған.
Өрт 45 минут ішінде толық сөндірілді. Зардап шеккендер жоқ.
Денсаулық сақтау министрлігі де өрт салдарынан орталықтың мамандандырылған зертханалары зардап шекпегенін хабарлады.
Зертханалық жұмыстар жүргізілетін бөлмелерді өрт шарпымаған, олардың герметикалығы бұзылмаған. Ведомство жұқпалы аурулардың таралу қаупі және халыққа төнетін қауіп жоқ екенін атап өтті.
Сонымен қатар Дезинформацияға қарсы күрес орталығының мәліметінше, соңғы күндері кейбір аккаунттар Алматыдағы өрт пен Ресейде оба ауруының болуы мүмкін деген қауесет арасында жалған байланыс орнатуға тырысып жатыр.
Орталықтың мәліметінше, мекемеде мамандандырылған зертханалардың болуының өзі алаңдаушылық тудыратын контекст қалыптастыру үшін пайдаланылуда. Алайда ресми мәліметтер бұл оқиғалардың арасында қандай да бір байланыс бар екенін растамайды.
Дезинформацияға қарсы күрес орталығы қолданушыларды арандатушылыққа бой алдырмай, ақпаратты ресми дереккөздер арқылы тексеруге шақырды.