В Атырау +14.7 
Дүниежүзілік мұғалімдер күніне орай сарапшылар Қазақстандағы педагогтердің санын және олардың табыс деңгейін есептеді. 2025/2026 оқу жылында ел мектептерінде тарихи рекорд тіркелді — мұғалімдер саны 415 мыңнан асты, деп хабарлайды Ranking.kz.
Зерттеушілердің мәліметінше, соңғы бір жылда жалпы білім беретін мектептердегі педагогтер саны 2,2%-ға өскен, ал бес жылда бұл көрсеткіш 13,3%-ға артқан.
Қазақстанда балаларға кімдер білім береді
Республикадағы мектеп мұғалімдерінің басым бөлігін әлі де әйелдер құрайды — 337,8 мың адам немесе жалпы құрамның 81%-дан астамы.
Мамандардың біліктілік санаттары бойынша бөлінісі мынадай:
- педагог-модераторлар: 126,7 мың адам (ең көп санат);
- педагогтер: 99,5 мың адам;
- педагог-сарапшылар: 95,4 мың адам;
- педагог-зерттеушілер: 82,6 мың адам.
Сонымен қатар мектептерде 5,5 мың тағылымдамадан өтуші және 3 мыңға жуық педагог-шебер жұмыс істейді.
Мұғалімдер ең көп қай өңірлерде
Мектеп педагогтерінің басым бөлігі халық тығыз қоныстанған оңтүстік өңірлерде еңбек етеді:
- Түркістан облысы — 67,4 мың адам;
- Алматы облысы — 34,9 мың адам;
- Алматы қаласы — 28,6 мың адам;
- Жамбыл облысы — 28,2 мың адам;
- Шымкент қаласы — 23,4 мың адам.
Бұл тізімде Астана жетінші орында ғана — елордада 21 мыңнан сәл астам мұғалім бар. Педагогтер саны ең аз Ұлытау облысында — 3,8 мың адам. Солтүстік Қазақстан және Шығыс Қазақстан облыстарында шамамен 12 мыңнан педагог жұмыс істейді.
Педагогтер қанша жалақы алады
Саланың стратегиялық маңыздылығына қарамастан, 2026 жылдың екінші тоқсанында білім беру саласындағы орташа айлық жалақы 385,7 мың теңгені құрады. Бұл экономика бойынша республикалық орташа көрсеткіштен шамамен 20%-ға төмен.
Бұл ретте сарапшылар аталған көрсеткіштің бүкіл білім беру саласы бойынша орташа мән екенін атап өтеді. Нақты мұғалімнің табысы еңбек өтіліне, біліктілік санатына, оқу жүктемесіне, сондай-ақ сынып жетекшілігі, дәптер тексеру және ерекше еңбек жағдайлары үшін берілетін қосымша ақыларға байланысты қалыптасады.
