В Атырау +15.6 
Халықаралық көтерме сауда компаниясы METRO AG Қазақстандағы қызметін 2027 жылғы наурыздың соңына дейін тоқтататынын мәлімдеді.
Қазақстандағы METRO-ның алты дүкені, сондай-ақ жеткізу қызметі кезең-кезеңімен жабылады.
Компания шешім елдегі бизнестің ұзақ мерзімді перспективаларын бағалау нәтижесінде қабылданғанын түсіндірді. Ұсынысты жергілікті нарыққа бейімдеуге және көтерме сауда бағытын дамытуға жасалған талпыныстарға қарамастан, METRO тұрақты өсу моделін қалыптастыруда қиындықтарға тап болуын жалғастырған.
METRO Қазақстанның бас директоры Месут Догукан бұл шешім қызметкерлер үшін қиын болғанын айтып, компания жабылу процесін персоналдың, клиенттер мен жеткізушілердің мүдделерін ескере отырып жүргізуге ниетті екенін атап өтті.
Қазір METRO Қазақстанда шамамен 650 адам жұмыс істейді. Компания өтпелі кезеңде еңбек заңнамасының барлық талаптарын сақтап, қызметкерлерге әділ әрі құрметпен қарауды қамтамасыз ететінін мәлімдеді.
METRO Қазақстан нарығына 2009 жылдың қазан айында шықты. Компанияның мәліметінше, 17 жыл ішінде дүкендерді, логистиканы, жеткізу тізбектерін, персоналды және серіктестік жобаларды дамытуға инвестиция салған.
Соңғы жылдары METRO қонақүйлермен, мейрамханалармен, қоғамдық тамақтану кәсіпорындарымен және сауда компанияларымен жұмыс істеуге басымдық беріп, жеткізу қызметін де кеңейтті. Алайда компанияның бағалауынша, клиенттері елдің әртүрлі өңірлеріне орналасқан азық-түлік көтерме саудасының мамандандырылған нарығы одан әрі өсу үшін қажетті әлеуетті қамтамасыз етпеген.
METRO әлемнің 30-дан астам елінде жұмыс істейді және онда 84 мыңнан астам қызметкер бар. 2024/25 қаржы жылында компанияның сатылым көлемі 32,4 млрд еуроны құрады.