В Атырау +15.6 
Қазақстанда маусымдық тұмауға қарсы вакцинациялау науқаны басталды, деп хабарлады ҚР Денсаулық сақтау министрлігі.
Халықты тегін вакцинациялау үшін 2,1 млн доза вакцина сатып алынды. Оның алғашқы 564 мың дозасы елге жеткізіліп, өңірлерге кезең-кезеңімен жөнелтіліп жатыр.
Вакцина Алматы, Түркістан және Жетісу облыстарына, сондай-ақ Алматы мен Шымкент қалаларына жеткізілді. Қалған өңірлерге вакцинаны жеткізуді 5 қазанға дейін аяқтау жоспарланып отыр.
Препарат жеткізілген өңірлерде медициналық ұйымдар халықты иммундауды бастады.
Науқан аясында ресейлік өндірістегі «Гриппол» вакцинасы сатып алынды. Денсаулық сақтау министрлігінің мәліметінше, оның штаммдық құрамы алдағы эпидемиялық маусымға арналған Дүниежүзілік денсаулық сақтау ұйымының ұсынымдарына сәйкес келеді.
Бірінші кезекте тегін вакцинациялау халықтың анағұрлым осал топтарына арналған. Олардың қатарында медицина қызметкерлері, диспансерлік есепте тұрған балалар, жетім балалар және ата-анасының қамқорлығынсыз қалған балалар, медициналық-әлеуметтік мекемелердегі контингент пен қызметкерлер, сондай-ақ эпидемиологиялық көрсеткіштер бойынша инфекция жұқтыру қаупі жоғары адамдар бар.
Өңірлерге вакцинациялау науқанын уақтылы бастауды және мақсатты топтар үшін вакцинациялаудың қолжетімді болуын қамтамасыз ету тапсырылды.
Денсаулық сақтау министрлігі қазан айы сырқаттанушылықтың маусымдық өсуі басталғанға дейін вакцина салдыру үшін оңтайлы кезең екенін еске салды. Вакцина алғаннан кейін ағзаға иммундық қорғанысты қалыптастыру үшін уақыт қажет.
Ведомство сондай-ақ вакцинация тұмаумен ауыру қаупін, сондай-ақ аурудың ауыр өтуі мен асқыну ықтималдығын төмендетуге көмектесетінін атап өтті.
Мақсатты топтарға кіретін азаматтарға вакцинация туралы ақпарат алу үшін тіркелген жері бойынша медициналық ұйымдарға жүгінуге кеңес беріледі.