В Атырау +17.8 
Оралда қызметтік бабын пайдаланып алаяқтық жасағаны үшін кінәлі деп танылған көші-қон қызметінің бұрынғы қызметкеріне үкім шықты.
Сот мәліметінше, 2025 жылдың ақпан айында көші-қон қызметінің инспекторы тексеру барысында уақытша тіркеудегі шетелдіктің көрсетілген мекенжайда іс жүзінде тұрмайтынын және жеке тасымалмен айналысатынын анықтаған.
Сот анықтағандай, полицей заңда қарастырылған шараларды қолданудың орнына бұл жағдайды өзінің мүддесіне пайдалануды ұйғарған. Ол шетелдікке Қазақстанда болуға қатысты мәселелерді шешуге көмектесуге, сондай-ақ басқа шетел азаматына уақытша тұруға рұқсат рәсімдеуге ықпал етуге уәде берген.
Нәтижесінде шетелдіктер үшінші тұлғалардың банктік шоттарына 270 мың теңге аударған. Дегенмен инспектор іс жүзінде уәде етілген әрекеттерді орындауды жоспарламаған да.
Кейінірек шетелдіктердің бірін Қазақстаннан шығып бара жатқан кезінде шекарашылар ұстады. Сот көші-қон заңнамасын бұзғаны үшін оны ел аумағынан шығарып жіберу туралы шешім қабылдады.
Бұрынғы инспектор кінәлі деп танылып, оған алынған соманың он еселенген мөлшерінде — 2,7 млн теңге көлемінде айыппұл тағайындалды.
Бұдан бөлек, ол мемлекеттік қызметте лауазымдарды атқару құқығынан өмір бойына айырылды. Айыппұл үкім заңды күшіне енгеннен кейін бір ай ішінде төленуі тиіс.