Шетелдік бидайды отандық өнім деп сатқан: Экономикалық қылмыс бойынша тергеу аяқталды

Батыс Қазақстан облысында шетелдік астықты отандық өнім ретінде заңсыз экспорттаумен айналысқан қылмыстық схема әшкереленді. Бес адам күдікті деп танылып, сотқа дейінгі тергеу аяқталды. Қазіргі уақытта іс тараптары қылмыстық кейс материалдарымен танысып жатыр.

Тергеу мәліметтері бойынша, күдіктілер Қазақстан аумағы арқылы жалпы құны 11,2 миллиард теңге болатын шамамен 130 мың тонна астықты заңсыз жөнелткен. Түпнұсқасы шетелден импортталған бидай Өзбекстан, Ауғанстан және Тәжікстанға тасымалданған.

Астыққа «Қазақстанда өндірілген» деген жасанды мәртебе беру үшін жалған тұлғалардың атына коммерциялық ұйымдар тіркелген. Осы фирмалар мен отандық шаруа қожалықтары арасында астық сатып алу туралы өтірік келісімшарттар рәсімделген. Бұл алаяқтық әрекет тасымалдау кезінде халықаралық транзиттік тарифтің орнына жеңілдетілген ішкі тарифті қолдануға мүмкіндік берген. Заңсыз схемада «Bakery Nan», «KazGrano», «Perfect Seed», «Weizen» және «Golden Grain Kazakhstan» ЖШС-лары пайдаланылғаны анықталды.

Транзиттік тарифті төлемеу салдарынан «ҚТЖ – Жүк тасымалы» ЖШС-не 1 миллиард теңгеден астам залал келтірілген.

Бұдан бөлек, күдіктілер салық берешегін өтеуден және кредиторлар алдындағы міндеттемелерден жалтарудың амалын жасаған. Олар бақылауындағы экспорттаушы компаниялардың қаражатын үлестес ұйымдарға аударып, кейін фирмаларды заңсыз банкроттыққа ұшыратқан. Мұндай әрекеттерден мемлекетке тағы 1,2 миллиард теңге шығын келді.

Сотқа дейінгі тергеп-тексеру аяқталды. Қазақстан Республикасы Қылмыстық-процестік кодексінің 201-бабына сәйкес, тергеу мүддесіне байланысты өзге ақпарат жария етуге жатпайды.