В Атырау +22.1 
Қазақ даласында дүниеге келген Пржевальский жылқысының алғашқы құлындарының аты белгілі болды. Сирек кездесетін жануарлардың жаңа буынына Ботай және Тұмар деген ат қойылды.
Құлындар осы жазда «Алтын Дала» мемлекеттік табиғи резерваты аумағындағы «Әліби» жабайы тұяқты жануарларды реинтродукциялау орталығында туған. Қазір құлындардың туғанына бір айдан асты: олар аумақты белсенді түрде зерттеп, өз үйірлеріне бауыр басып келеді.
Екі құлын да 2024 жылы Берлиндегі Тирпарктен Қазақстанға әкелінген Тесса мен Умбра атты биелердің алғашқы төлдері. Ботай — Тессаның, ал Тұмар — Умбра биенің құлыны.
Жаңа туған құлындардың есімінде терең символдық мән бар:
Ботай — қазіргі Қазақстан аумағында жылқыны қолға үйретудің басталғанын білдіретін аттас археологиялық мәдениетке сілтеме.
Тұмар — қорғау мен амандықты білдіретін дәстүрлі қазақ тұмары.
Ботай мен Тұмардың дүниеге келуі — «Жабайы жылқыларды қайтару» ауқымды бағдарламасының басты кезеңі. Алғашқы дараларды әкелу бұл түрдің тарихи мекеніне оралуын білдірсе, ұрпақтың дүниеге келуі Пржевальский жылқыларының қазақ жерінде жақсы жерсініп жатқанын дәлелдейді.
Қазір құлындар мамандардың тұрақты бақылауында. Алда оларды үйірде өсіп-жетілу және жабайы даладағы өмір күтіп тұр.