В Атырау +21.3 
Қазақстанда Beeline компаниясы мен Starlink Mobile бірлесіп Direct to Cell технологиясы арқылы спутниктік мобильді байланысты ресми түрде іске қосты.
Бұл қызмет жерүсті байланыс жоқ аймақтарда үйлесімді смартфон арқылы хабарлама жіберіп, қабылдауға және базалық интернет-сервистерді пайдалануға мүмкіндік береді.
Жоба Мемлекет басшысы Қасым-Жомарт Тоқаевтың 2025 жылғы АҚШ-қа ресми сапары барысында жасалған келісімнің нәтижесінде жүзеге асты. Алғашқы сынақтар сол жылы өткізілген болатын.
Жасанды интеллект және цифрлық даму министрі Жаслан Мәдиев Қазақстанның Орталық Азияда Direct to Cell технологиясын алғаш енгізген ел екенін атап өтті. Қызмет қазір Beeline абоненттеріне промо-кезеңде тегін ұсынылады.
Технология арнайы спутниктік телефонды қажет етпей, смартфонды тікелей Starlink спутниктеріне қосуға мүмкіндік береді. Бұл әсіресе шалғай ауылдарда, трассаларда және таулы аймақтарда байланыс орнатуға қолайлы.
Қызметті пайдалану үшін Android құрылғысында Janymda қосымшасын жаңартып, Starlink қызметін қосу және деректер роумингін белсендіру жеткілікті. Жерүсті желісі болмаған жағдайда «Beeline Starlink» спутниктік желісін қолмен таңдауға болады.
Осылайша, Қазақстанда байланыс инфрақұрылымын кеңейтуге бағытталған жаңа кезең басталды.