KEGOC компаниясы Қазақстандағы таңғы іркіліс пен электр жарығының өшу себебін түсіндірді

25 қыркүйекте таңертең ерте Қазақстанның оңтүстік өңірлерінің кейбір тұрғындары электр энергиясының өшуіне тап болды. Бұған көршілес Өзбекстанның энергетика жүйесіндегі ірі апаттық оқиға себеп болды.

Электр желісін басқаратын ұлттық оператордың мәліметінше, Астана уақытымен сағат 05:02-де Өзбекстанның энергетика жүйесінде жалпы қуаты 1 516 МВт болатын генерация кенеттен өшіп қалған.

Болған іркіліс Орталық Азияның Біріккен энергетика жүйесі (ОА БЭЖ) тарапынан қуаттың күрт ауысуын тудырып, бұл «Қазақстанның Солтүстігі — Оңтүстігі» негізгі транзитінің автоматты түрде бөлінуіне әкеп соқты.

«Апат орын алған сәтте Қазақстанның энергетика жүйесінде тұтынушыларды шектеу көлемі 962 МВт-ты құрады. Бұл ретте апатқа қарсы автоматика штаттық режимде жұмыс істеп, ауқымды блэкауттың алдын алды», — деп хабарлады KEGOC мамандары.

Энергетиктер жағдайды жедел қалыпқа келтіре алды:

• 05:02 — Өзбекстанның энергетика жүйесіндегі апаттың тіркелуі, жиілікті автоматты түрде жеңілдету (ЖАЖ) жүйесінің іске қосылуы;

• 05:43 — Қазақстан БЭЖ Оңтүстік аймағының Орталық Азияның энергетика жүйелерімен параллель жұмысы толық қалпына келтірілді;

• 05:43-тен кейін — өңірлік желілік компанияларға барлық шектеулерді толық алып тастау және тұтынушыларға электр энергиясын беруді қайта бастау туралы пәрмен берілді.

Қазір Қазақстанның Бірыңғай электр энергетикалық жүйесі штаттық режимде жұмыс істеп тұр.