В Атырау +27.9 
Қазақстанда ауыр қылмыс құрбандары мен олардың туыстары мемлекеттен 30-дан 50 айлық есептік көрсеткішке (АЕК) дейін біржолғы өтемақы алуға құқылы. Бұл қаржылай көмек қылмыскердің анықталғанына немесе оның шығынды өтегеніне қарамастан төленеді.
«Жәбірленушілерге өтемақы қоры туралы» Заңға сәйкес, бастапқы қаржылай қолдау белгілі бір санаттағы азаматтарға тағайындалады. Бұл тізімге:
Жыныстық зорлық-зомбылыққа ұшыраған кәмелетке толмағандар;
Адам саудасы мен азаптаудың құрбандары;
Қылмыс салдарынан денсаулығына ауыр зиян келген немесе АИТВ (ВИЧ) жұқтырған адамдар енеді.
Егер қылмыс салдарынан азамат қайтыс болса, бұл өтемақыны оның заңды өкілдері немесе жақын туыстары ала алады.
Біржолғы төлем мөлшері жасалған қылмыстың санатына қарай есептеледі. Жәбірленуші өзін ресми түрде жәбірленуші деп таныған күннен бастап үш жыл ішінде өтініш беруге мүмкіндігі бар.
Қылмыстық істі жүргізуші тергеуші немесе анықтаушы азаматты жәбірленуші деп тану туралы қаулы шығарған сәтте оған Қордан өтемақы алу құқығы мен оны рәсімдеу тәртібін жазбаша түрде түсіндіруге міндетті.
Төлемді алу үшін азамат өзінің банктік шоты көрсетілген өтінішті істі жүргізіп жатқан тергеушіге тапсырады. Қажетті процестік құжаттар дайындалғаннан кейін Қазынашылық қаржыны азаматтың есепшотына аударады.
Мемлекеттік өтемақыны алу азаматты кейін сот арқылы қылмыскердің өзінен материалдық және моральдық шығынды толық өндіріп алу құқығынан шектемейді.