«Қашып кетсең, тауып алып, көзіңді құртамын»: Астанада массаж жасаушы қыз зорланғанын мәлімдеді

Астана полициясы сауықтыру массажы қызметін көрсететін қызды зорлау ісі бойынша күдіктінің ұсталғанын хабарлады.

Бұған дейін құқық қорғаушы Ләззат Рақышева жәбірленушінің басынан өткен оқиғасын жариялап, тергеу барысына қатысты сұрақтардың бар екенін мәлімдеген болатын.

Рақышеваның айтуынша, 21 қыркүйекте кешке бойжеткен Human Rights Lawyers қорына заңгерлік көмек алу үшін жүгінген. Орын алды деген қылмыс 4 шілдеде болған, алайда жәбірленуші істің созбалаңға салынып жатқанына шағымданған.

Threads желісінде жарияланған оқиғада қыздың сұлулық салонынан кабинетті жалға алып, емдік массаж жасағаны айтылады. Клиенттердің бірі сеанстан кейін интимдік қызметтер туралы сұрай бастаған. Ол бас тартып, оны WhatsApp-та бұғаттап тастаған.

Шамамен бір айдан кейін ер адам онымен қайта хабарласып, үйде массаж жасауға тапсырыс берген. Қыздың айтуынша, бармас бұрын ол интимдік қызмет көрсетпейтінін бірнеше рет ескерткен.

Жәбірленушінің айтуынша, сеанс кезінде ер адам оған тап беріп, соққыға жыққан және жыныстық зорлық-зомбылық көрсеткен. Ол пәтерден шығып кетуге тырысып, терезеден көмекке шақырған, алайда ер адам оны ұстап тұрып, пышақпен қорқытқан. Қыздың айқайына ауладағы адамдар назар аударған.

Қыз пәтерден қашып шыққан кезде айналадағылардан көмек сұраған. Екі жас жігіт полиция қызметкерлерін шақырған, олар қыздың айтуынша, ер адамды ұстап алған.

Рақышева бастапқыда полицияға жеткізілгеннен кейін ер адамның босатылғанын мәлімдеді. Құқық қорғаушының жарияланым сәтіндегі мәліметі бойынша, ол қорғануға құқығы бар куә мәртебесінде қала берген.

Бойжеткен сонымен қатар полиция қызметкерлерінің өз тарапынан сұрақ туғызған әрекеттері туралы хабарлады: оның айтуынша, оқиғадан кейін оны өзі нұсқаған ер адаммен бір бөлмеде қалдырған.

Кейінгі жарияланымда Рақышева қордың істі өз бақылауына алғанын айтты. Жәбірленуші тергеушіге қарсылық білдіру туралы өтініш түсіріп, тергеуді аудандық бөлімшеден Астана қаласы Полиция департаментінің тергеу басқармасына беру мәселесін қойды.

Елорда полициясы өз түсініктемесінде күдіктінің ұсталғаны және уақытша ұстау изоляторына қамалғаны туралы хабарлады.

«Аталған дерек бойынша қылмыстық іс қозғалды. Күдікті ұсталып, уақытша ұстау изоляторына қамалды», — деп хабарлады Астана қалалық ПД-да.

Ведомствода қажетті тергеу шаралары жүргізіліп жатқанын да айтты.