Атырау, 29 наурыз 09:36
 ашықВ Атырау +10
$ 448.15
€ 483.46
₽ 4.86

Шымкентте «Нұр Отанның» атын жамылған алаяқтар жүр

1 450 просмотра
Шымкентте «Нұр Отан» партиясының атын жамылып, жұрттың жинаған қаражатын қолды етіп жүрген алаяқ топ пайда болды. Саяси қоғамдық ұйымның атынан айласын асырып жүргендер әзірге ешкімнен айылын тартар емес. Соның салдарынан алаяқтардың құрбандары көбейіп отыр, деп жазады otyrar.kz.

 Шымкент тұрғыны, 75 жастағы әжей — әлгі алаяқтардың кезекті құрбаны. Қария осы жасында арбауға түсіп, бармағын шайнап қаламын деп ойламаса керек. Кейуананың айтуынша, 25-30 жастағы екі келіншек пен бір жігіт үйіне келіп, жақсылап «түсіндірме» жұмыстарын жүргізген. Сосын соңғы тиынына дейін сыпырып кетіпті. Теңгенің құнсызданып жатқанын айтып, алған қаржысын қосымша 30 пайыздық үстемақымен қайтарамыз деген әлгі топ әжейді осылайша тақырға отырғызып кетіпті. Бас-аяғы 1 миллион 570 мың теңгені қолма-қол санап алғандар содан соң ізін жоғалтыпты. Ең сорақысы, алаяқтар әжейді бұл «НұрОтан» партиясының арнайы акциясы деп алдап соққан.

«Осы уақытқа дейін тірнектеп жиған ақшам — 12 мың доллар. Теңгеге шаққанда 2 миллионға жуық ақшам бар еді. Мен бұл қаржыны 1995 жылдан бері, 18 жыл бойы жинап келе жатырмын. Қазір, міне, жылай-жылай көз жасым да таусылды», - дейді Ирина Комина, зейнеткер.

Соңынан алданып қалғанын сезген кейуана бірден полицейлерің көмегіне жүгінген. Мамандар сол сәтте-ақ келіп әжейдің арызын және ізін суытқандар жайлы дәйектерді алып кеткен. Көрші дүкеннің бейнебақылау камерасына жазылып қалған жазбаны да жәбірленуші өзі апарып беріпті. Бірақ тәртіп сақшыларынан әзірше еш пайда болмай отыр. Әлі күнге әрекетке кіріспеген мамандарға кейуананың өкпесі қара қазандай. Бұл — бұл ма, учаскелік полицейлер мұндай оқиға үшінші рет орын алғанын жайып салды.

«Бұл әйелдің арызының алдында тағы осындай екі факті болған. Соның бірінде мынау алаяқтар Түркістан көшесінде бір әйелдің 80 мың теңгесін алып кеткен. Тура осындай әдіспен. Онда да екі қыз «Нұр Отаннан» деп келіпті. Одан соң кірпіш зауытының аялдамасына апарған да әйелдің ақшасын тартып әкеткен. Ал екінші оқиға Алдияров көшесінде болды», - дейді Бахадүр Мавланов, учаскелік полиция инспекторы.

Алаяқтарға алданған кейуана «НұрОтан» партиясына да барып, мән-жайды айтыпты. Мұндағы мамандар әжейге кеңесін беріп, шығарып салған. Келесі жолы жерлестеріміздің мұндай жағдайға тап болмасы үшін саясаткерлер сақ болуға шақырды.

«Нұр Отан» партиясы жасырын түрде ешқандай акция ұйымдастырмайды. Тек жариялы түрде өткіземіз акцияның бәрін. Сондықтан ондай жастарға сеніп қалмауларыңызды өтінемін», - дейді «Нұр Отан» партиясы облыстық филиалы қоғамдық қабылдау бөлімінің меңгерушісі Тұрлыбай Сейдуалиев.

Ал қарияны қапа қылған полиция бөліміндегілер алаяқтарды талмай-тынбай іздеп жатырмыз деуден жаңылмады. Айтуларынша, тіпті болжаулар жасап, жұмысқа кірісіп кетіпті.

«Еңбекші аудандық полиция бөлімінің тергеушісі Қазақстан Республикасы Қылмыстық кодексінің 177-бабы, 3-тармағы, «Б» бөлігімен қылмыстық іс қозғаған. Қазіргі таңда осы күдіктілер іздестіріліп жатыр», - дейді Еңбекші полиция бөлімі басшысының орынбасары Болат Елмұрзаев.

Дереккөз: BNews.kz

28 қазан 2013, 08:59

Қате таптыңыз ба? Тінтуірмен белгілеп, Ctrl + Enter түймесін басыңыз.

Осы мақала тақырыбына қатысты ой-пікіріңізбен бөлісіп, бейнежазба жолдағыңыз келсе, WhatsApp +7 771 37 800 38 нөміріне және editor@azh.kz поштасына жібере аласыз.