В Атырау -2 
Атырау облысында Қызылқоға ауданының Жангелдин ауылында жоғалған отбасыны іздеу жұмыстары жалғасуда.
«АЖ» тілшісі Жангелдин ауылының әкімі Қанат Ғайсамен сөйлесіп, отбасы мен іздеу барысы туралы толық ақпарат алды.
Әкімнің айтуынша, төрт адамнан тұратын отбасы бұрын ешқандай күдік тудырмаған және ерекше мінез-құлық көрсетпеген. Бұл тыныш, тұйық отбасы ауылдастарымен ешқандай жанжалға бармаған әрі қандай да бір мәселелерімен танылмаған.
«Олар әкімдіктен көмек сұрамаған, себебі тұрақты табыстары болды. Отбасында екі зейнеткер және мүмкіндігі шектеулі екі адам бірге тұрған. Жиырма шақты қойы мен оннан астам ірі қарасы бар еді, сол арқылы күн көрген», — деді әкім.
Іздеу жұмыстары 3–4 қаңтарда басталған. Оған Төтенше жағдайлар департаментінің қызметкерлері мен ауыл тұрғындары қатысуда. Әзірге нәтиже жоқ.
Әкімнің сөзінше, отбасы ауылдан қалаға қатынайтын такси қызметін пайдаланбаған.
«Ауылымыз шағын, бөтен көлік келсе немесе біреу кетсе, бірден байқалар еді», – деп атап өтті ол.
Сондай-ақ, әкімнің сөзінше, отбасы мемлекеттік мекемелерге сирек барған. Соңғы рет 28 қазанда қарт әйел қан қысымының жоғарылауына байланысты дәрігерге жүгінген. Мұндай жағдай оның жасындағы адамдар үшін кең таралған құбылыс.
Қазіргі уақытта отбасыны іздеу жұмыстары жалғасып жатыр.
Айгүл МАНСУРОВА