Қазақстанда қатерлі ісікке шалдыққан балалардың 70%-дан астамы сауығып жатыр

Қазақстанда жыл сайын 800-ден астам балаға онкологиялық және гематологиялық аурулар диагнозы қойылады. Оның ішінде шамамен 600 балада қатерлі ісік (соның ішінде гемобластоз), ал қалған 200-ге жуық балада ауыр гематологиялық (қатерсіз) патология анықталады.

Соңғы он жылда бұл аурулардың таралу деңгейі тұрақты қалыпта сақталып келеді — 100 мың баланың әрбіріне шаққанда 9,7 жағдайдан келеді.

Қатерлі ісіктердің таралу құрылымы халықаралық көрсеткіштермен ұқсас:

• Жедел лейкоз – 30%-дан астам;

• Орталық жүйке жүйесінің ісіктері – шамамен 17%;

• Лимфома мен нефробластома – 10-11%;

• Нейробластома – шамамен 7%.

Иммунотерапия мен таргеттік терапия сияқты заманауи емдеу әдістерін енгізудің нәтижесінде Қазақстанда балалар арасындағы қатерлі ісіктерден аман қалу деңгейі 70%-дан асты.

Соңғы бес жылда нейробластома, лимфома және лейкоз диагнозы қойылған 40-тан астам бала моноклоналды антиденелерге негізделген инновациялық дәрілік препараттармен ем қабылдады.