Атырау, 19 сәуір 15:56
Кешке ашық+4, түнде 0
ҚР Ұлттық банкінің валюта бағамы: $ 379.19  € 426.63  P 5.92

Бас мүфти қазақстандықтарды Рамазан айының басталуымен құттықтады

2 шілде 2013 14:52

АСТАНА, 2 шіл – Қазақстан жаңалықтары АА. Қазақстан мұсылмандары діни басқармасының төрағасы, Бас мүфти Ержан қажы Малғажыұлы қазақстандықтарды  9 шілдеде басталатын Рамазан айымен құттықтады.

«Құрметті бауырлар! Мұсылман қауымының ұлық мерекесі – қасиетті Рамазан айы мүбәрәк болғай! Оразаға аман-есен жеткізген Алла тағалаға сансыз шүкірлер мен мадақтар болсын!», - делінген http://www.muftyat.kzсайтында орналастырылған хабарламада.

«Алла тағаланың теңдессіз сыйы – Отанымыздың тәуелсіздігін баянды ете түсу үшін көзі ашық, көкірегі ояу, ел қамын ойлайтын әрбір азаматқа артылар сенім мен талап зор. Бұл қадам әртүрлі саладағы тапсырылған істі атқаруға тиіс барша қазақстандықтарға үлкен жауапкершілік жүктейді. Мемлекеттің мерейін үстем ету жолында әлемдік тәжірибенің ең озығы мен ең жаңашылын таңдап алу үшін елдің әрбір азаматынан білімділік пен біліктілік талап етіледі», - деп санайды ол.

«Қымбатты отандастар! Біз бүгінде тәуелсіз еліміздің жарқын болашағы үшін қызмет ететін білімді, иманды, ибалы, Отанын сүйетін ұрпақ тәрбиелеу жауапкершілігі жүктелген заманда өмір сүріп отырмыз. Иман бұлағынан сусындаған адам арына дақ түсірмейді. Өйткені, Ислам адамгершілік құндылықтарды қастерлеуге үндейді. Дәстүрлі діндердің мақсаты – ізгілік пен адамгершілік. Осы орайда баршаңызды қасиетті Рамазан айын игі істермен, Жаратушыға жақындататын қайырымдылықтармен, мұқтаж жандарға көмектесумен, жетім мен жесірге, қарттар мен мүгедектерге мейірім танытып, өзара түсіністікпен өткізуге шақырамын. Алла тағала қасиетті Құранда: «Жақсылықта, тақуалықта бір-біріңе көмектесіңдер», – деп бұйырған («Мәида» сүресі, 2-аят)», - делінген үндеуде.

Рамазан – тәрбие айы, жасаған жақсылықтардың сауабы еселеніп жазылатын, Жаратушы Иеміздің жарылқауына, рақымына бөленетін ай. Олай болса, Алланың теңдессіз сыйына ізгі де, қайырымды іс-әрекеттерімізбен қол жеткізуге аянып қалмайық! Имандылығымызды күшейте түсейік!

Қасиетті айдың құрметіне тойларда, кештерде арақ-шарап ішілмесе, артық ысырапшылдыққа жол берілмесе, азық-түлік бағалары төмендетілсе, халыққа қызмет етудің барлық түрлеріне жеңілдіктер жасалса, мұқтаж жандарға көңіл бөлінсе, Алла разылығы үшін берілетін ас-тағамдар ауызашарлар кезінде берілсе деген ізгі ниетіміз орындалса нұр үстіне нұр болар еді.

Осы Үндеу ерекше мейірімді, құдіреті күшті Алла тағаланың разылығы мен рақымына, берекесі мен шапағатына еліміз бөлене берсін деген асыл арман, ұлы мұраттан туған ізгі мақсат еді. Жарылқаушы айда жасаған ізгі ниет пен амалдарыңыз басқа да айларда жалғаса бергей! Алла тағала баршамыздың екі дүниеде де жүзімізді жарық еткей! Еліміз аман, жұртымыз тыныш болғай! Әмин!

Дереккөз: newskaz.kz

Нашли ошибку? Выделите её мышью и нажмите Ctrl + Enter.
 

1610 рет қаралдыБасты бет Поделиться:

Подпишитесь и узнавайте о новостях первыми


Басты бет

1 2 3 4 5