Жолаушыларды су көлігімен тасымалдау 78,7% өсті

Маусым мен шілде айларында ішкі су көлігімен 142,2 мың адам тасымалданды, бұл өткен жылдың сәйкес кезеңімен салыстырғанда 78,6% артық (2023 жылғы маусым-шілде – 79,6 мың адам), деп хабарлайды Ұлттық статистика бюросы.

Барлық қатынаудағы жолаушыларды тасымалдаудан түскен кіріс 318,1 млн теңгені құрады.

Ішкі су қатынасы Абай, Атырау, Павлодар, Шығыс Қазақстан облыстарында және Астана қаласында бар.

Айта кетейік, ішкі су көлігіне жолаушылар кемелері мен серуен қайықтары жатады.

Жаздың екі айында жолаушыларды теңіз көлігімен тасымалдауда 8,4% төмендеу байқалды.

2024 жылдың маусым-шілде айларында 23,8 мың адам тасымалданды, ал өткен жылдың сәйкес кезеңінде бұл көрсеткіш 26 мың адам болған.

Айта кетейік, Қазақстанда теңіз көлігі Атырау және Маңғыстау облыстарында бар.