Көгалды жер тартымды болғанмен, бөлек орындар жасау керек

Кәсіпкерлер аллеясы мен Жеңіс саябағы соңғы кездері атыраулықтардың сүйікті демалыс орнына айналды. Ең алдымен бұған қала тұрғындарына пикник ұйымдастыруға ыңғайлы көгал себеп. Бірақ көгалдандырушылар қалада пикник жасау үшін арнайы аймақтар жабдықталуы керек дейді. Ал көгалдарды аллеяны безендіріп, ерекше микроклимат жасау үшін қалдыру керек.

- Көгалда үнемі пикник ұйымдастыруға болмайды. Себебі оны таптаса, астындағы топырақ тығызданып, шөптің тамыр жүйесінің аэрациясы бұзылып, кеуіп кетеді. Жалаң аяқ жүрсеңіз де, шөпте із қалатынын түсіну керек. Іздің орны ұзақ тұрады, жиі тапталатын жерлерде көгалдар құрыр кетеді. Әрине, ыстық күнде жасыл көгал тартымды. Бірақ бұл жаппай пикник ұйымдастыруға, корпоративтік ойындар, футбол немесе волейбол ойнауға арналған алаң емес екенін ұмытпауымыз керек. Иә, тұрғындарымыз «Жеңіс» саябағында топ болып спорттық жарыстар ұйымдастырады. Мұндай демалыстың салдарынан саябақтағы бүкіл көгал тапталып қалады. Көгалдан түк қалмайды, – дейді «Каспийдормостострой» ЖШС өкілі Леонид ЗАДЕРНЫЙ.

Оның айтуынша, футбол алаңындағы көгалдың өзі тұрақты пайдалануға шыдамайды. Сондықтан футболшылар жасанды шөпте жаттығады, ал табиғи шөпті көгалы бар чемпионаттарға арналған алаң тек жарыс кезінде ғана мақсатты түрде пайдаланылады. Қалған уақытта мұндай алаңдардағы шөпті көздің қарашығындай сақтайды. Еуропадағы немесе Алматыдағы табиғат аясындағы пикниктер тәжірибесіне келетін болсақ, климаттық ерекшеліктердің айырмашылығын және біздің өңірдегі және басқа елдер мен қалалардағы ылғалдылық айырмашылығын, топырақ құрамының ерекшеліктерін ескеру қажет. Біздің тұзды топырақта кез келген нәрсені өсіру үшін көп еңбек қажет. Бұдан басқа, Еуропадағы көгал мәдениеті жүздеген жылдар бұрын пайда болды. Ол тіпті монархиялар кезінде де өсірілді, ол жерде табиғи шөп төселген аумақ жүздеген шаршы шақырымды құрайды; Атырауда 360 мың адамға небәрі 142 шаршы метр газон алаңы тура келеді. Бұл сандар көгалдардың осы шағын бөлігіне түсетін жүктеме деңгейін көрсетеді. Бірақ адамдар КДМС жұмысшыларының тапталған көгалдың орнына жаңадан егілген көгалдарды баспау туралы өтінішін елемейді.

- Сол Еуропада мұндай аумақтар қоршалып, қалпына келтіру кезеңінде «Көгал үстімен жүрме!» деген маңдайша ілінеді. Біздің елде оларды қызметкерлердің көзінше жұлып алады, ата-анасының қасында жүріп-ақ балалар суаратын жаңбырлатқыштарды бұрап тастайды, оған ешқандай жауапкершілік қарастырылмаған. Махамбет алаңында да ондаған жаңбырлатқыштар істен шыққан. Балалар ойын көліктермен олардың үстінен өтіп жатыр. Бірақ бүкіл әлемде қала алаңдары тыныш серуендейтін жер, ал балалар аттракциондары мен ойын алаңдары мүлдем басқа инфрақұрылым. Менің түсінігімше, қала алаңдарында олар болмау керек. Мұндай мақсатқа арнайы ойын алаңдары, жұмсақ жасанды төсемелер, балаларды бақылап отыратын ата-аналар үшін - үстел мен орындықтар болған дұрыс. Ал көгалдар көзді қуантып, қоршаған ортаны ылғалдандыру үшін қажет. Біз кішігірім өкілеттігіміз аясында түсіндірме жұмыстарын жүргіземіз, көбіне шөпке аяушылық білдіріп, оны таптамауды өтінеміз.  Ал ересек ер азаматтардың, әкесі баласының алдында бізге қандай жауап беретінін білесіз бе? «Бір рет ойнағаннан ештеңе етпес, әлі өседі ғой» дейді. Сенесіз бе, жоқ па, біз тіпті мешіт пен шіркеуге де барып, уағыз айтқан кезде адамның рухани ғана емес, материалдық, жер мен табиғатқа да қамқорлық жасауы керек екенін еске салуды сұрадық. Бәлкім, жерлестерімізге осылайша жеткізетін шығармыз. Қаламыздың жасыл желек жамылғанын қалаймын, бірақ бұл үшін тек біздің күшіміз жеткіліксіз, - дейді Л.Задерный.

Оның пікірінше, мәселені қала ішінде ұйымдастырылған пикник алаңдары шеше алар еді: шатыр, орындықтары бар бірнеше үстел, мангал, қоқыс жәшіктері. «КДМС» ЖШС өз тарапынан осындай аумақтардағы жасыл желекті де күтіп-баптауға дайын. Бұл идея қала тұрғындарына ұнайтыны сөзсіз - қаладан алысқа барудың қажеті жоқ, кез келген жұмыс күні пикникке шығуға болады, демалыс күндерін күтудің қажеті жоқ. Қала билігіне Атыраудың әр түкпірінен шағын жер бөлсе болғаны, ал қала тұрғындары жақсы нәрсеге тез үйренеді.

Зульфия ИСКАЛИЕВА