Қай кезеңде екпе алған жөн?

ПТР әдісі арқылы Covid-19-ға антиденелерінің концентрациясын анықтау мүмкін емес, - дейді ҚР Денсаулық сақтау министрлігі Ұлттық қоғамдық денсаулық орталығының басқарма төрағасының орынбасары Айнагүл ҚУАТБАЕВА.

Ол Атырауға біздің өңірдегі ахуалды зерделеп, қажет болған жағдайда әріптестеріне әдістемелік және практикалық көмек көрсету мақсатында келген. «АЖ» осыны пайдаланып, оған қазіргі таңда тұрғындардың көпшілігін мазалап жүрген сұрақтарды қойды. Вакциналау алдында антиденелерді анықтау үшін ПТР сынамасын тапсыру керек пе? Неліктен ауырып жазылғандар немесе ПТР вакцинасының екі компонентін алғандардың бәрінде бірдей антиденелердің бар екенін көрсетпейді - бұл вакцинаның сапасына күмән келтіріп, қауесет тудырады.

- Бұл жағдайда ПТР сынамасы дұрыс ақпарат бермейді. Бұл үшін басқа диагностикалық ИФА әдісі бар. Бірақ, өкінішке орай, қазіргі уақытта ИФА диагностикасы үшін ағзадағы бұл антиденелердің концентрациясы қорғаныш болып саналады дейтін концентрация мен белгілі бір диапазонды дәл анықтай алатын сынамалар жоқ. Мұндай стандарт әлі жоқ, әзірге әзірленуде, - дейді А.Қуатбаева. -Қазіргі уақытта антиденелерді анықтау үшін түрлі сынамалар қолданылады, олардың барлығы біріздендірілгенше, белгілі бір диапазон қорғаныш ретінде бекітілмейінше, антиденелердің концентрациясын анықтау үшін ИФА сынамасын кеңінен қолдану қажеттілігі туралы айта алмаймыз.

Ол вакциналаудан немесе ауру жұқтырғаннан кейін ағзада табиғаты ұқсас антиденелер пайда болатынын айтты. Инфекциядан кейінгі антиденелер жоғары концентрацияда ағзада 3 ай сақталады, содан кейін олардың деңгейі күрт төмендейді. Сауыққаннан кейін жарты жылдан соң концентрация төмен болады. Бұл дәлелденген, ауырып жазылған адамдардың үш айдан кейін коронавирусты қайта жұқтыру ықтималдығы жоғары болғандықтан, мамандар осы кезеңнен кейін екпе алуды ұсынады. Вакцина алғандарға келетін болсақ, екпеден кейін антиденелердің жоғары концентрациясы кем дегенде 6 ай тұрады, бұл вакцинаның көптеген түрінен белгілі. Бәлкім, бұл кезең іс жүзінде ұзағырақ болар, бірақ барлық вакцина бойынша мұндай деректер әзірге жоқ, өйткені олардың кейбіреулері жақында ғана қолданыла бастады.

Бәлкім, бақылаудан кейін екі компоненттен тұратын толық вакциналау әсері 10 айға немесе одан да ұзақ уақытқа созылатын шығар. Ғалымдарға бұл мәселені зерттеу үшін уақыт қажет.

Зульфия ИСКАЛИЕВА

Сурет пен бейнежазбаны түсірген автор