ҚР Білім және ғылым вице-министрі Шолпан Каринова мектеп оқушыларын қашықтан оқытуға дайындалған видео сабақтарда кеткен қателіктер үшін кешірім сұрады, деп хабарлайды zakon.kz.
-Ия, біз бұл қателікті байқап отырмыз. Қашықтан оқыту біз күтпеген жағдай еді, ал мұғалімдер бұған дайын болмады. Көп мұғалім қатты қобалжыды (бейне оқулықтарды түсіру кезінде). Қазір осы екі апта ішінде 700-ден астам бейне сабақ көрсетілді. Оның көбі көктемгі демалыста түсірілді, біз осы қателіктер үшін қоғамнан, ата-аналар мен оқушылардан кешірім сұраймыз, - деді Шолпан Каринова онлайн-брифингте.
Оның айтуынша, мұғалімдер тақырыпты түсіндірерде қателік кеткен, ал бейне сабақ қайта өңдеуге жіберілді.
Естеріңізге сала кетейік, әлеуметтік желіде 4-сыныпқа арналған қазақ тілі сабағында мұғалім сөйлем мүшелерін ажырата алмаған бейнесабақ сыналып, жан-жақты тарап кеткен, сол секілді 1-сыныпқа арналған сабақта да мұғалім сөздерді буындарға дұрыс бөле алмады.