Алматыда коронавирус жұқтырған 12 жастағы қыз дертінен сауықты

Алматыда балалар жұқпалы аурулар ауруханасында ем алып жатқан 12 жастағы қыз дертінен айықты. Бұл туралы Алматы қаласының әкімдігі хабарлады.

"Ертең анализ расталғаннан кейін тағы бір пациентті шығару жоспарланып отыр. Ол қалалық балалар жұқпалы аурулар ауруханасында емделіп жатқан 12 жастағы қыз", - делінген ақпаратта.

Бұған дейін ақпарат және қоғамдық даму министрі Дәурен Абаев екі адамның аурудан жазылғанын хабарлаған еді. Оның бірі - Нұр-Сұлтанда, екіншісі - Алматы қаласында.

Ал 27 наурызда Алматыда үшінші науқас ауруханадан шықты. Ер адам қалаға 13 наурызға қараған түні Берлин-Минск-Алматы чартерлік рейсімен келген.

Соңғы мәлімет бойынша, Қазақстанда коронавирус жұқтырған 126 науқас тіркелді. Нұр-Сұлтан қаласында – 60, Алматы қаласында – 48, Қарағанды қаласында – 4, Жамбыл облысында – 3, Атырау облысы – 3, Шымкент қаласында – 2, Алматы облысында – 1, Ақтөбе облысында – 1, Солтүстік Қазақстан облысында – 1, Ақмола облысында – 1, Павлодар облысында – 1 адам, Маңғыстау облысында - 1 адам.

26 наурызда Қазақстанда коронавирустан бір адам қайтыс болды.

Дереккөз: Sputniknews.kz