В Атырау -10 
Қазақстан Премьер-Министрі А. Мамин Ашхабадта Түрікменстан Президенті Г. Бердымұхамедовпен кездесті және ТМД ҮБК отырысына қатысты, - деп хабарлайды primeminister.kz сайты.
Кездесуде Сауда-экономикалық қатынастардың барлық бағыттары бойынша қазақстандық-түрікменстандық ынтымақтастық перспективалары талқыланды.
ҚР Премьер-Министрі Қазақстан мен Түрікменстан арасындағы екіжақты қатынастар тұрақты түрде дамып жатқанын атап өтті.
«Біз сауда-экономикалық байланыстардың тереңдей түсуіне аса мән береміз. Көлік инфрақұрылымы мен ортақ шекараның болуын ескергенде, өзара тиімді ынтымақтастықты одан әрі нығайтудың үлкен әлеуеті бар», — деді А. Мамин.
Келіссөздер барысында энергетика, ғарыш, ауыл шаруашылығы салаларындағы, әскери-өнеркәсіптік кешен, көлік-транзит дәліздерін дамытудағы өзара іс-қимыл келешегі аталып өтті. «Өзара сауда көлемін едәуір арттыруға қол жеткізу туралы ортақ міндет қойылды. Қазақстан бұл міндетті іске асыру үшін барлық күш-жігерін салуға әзір», — деді Асқар Мамин.
Ашхабадта ҚР Премьер-Министрі Асқар Мамин ТМД Үкіметтерінің басшылары кеңесінің шағын және кеңейтілген құрамдағы отырыстарына қатысты.
Достастықтағы биылғы жыл Түрікменстан Республикасының төрағалығымен өтіп жатыр.
ТМД ҮБК отырысына Ресей Федерациясының Премьер-Министрі Д. Медведев, Беларусь Премьер-Министрі С. Румас, Әзербайжан Премьер-Министрі Н. Мамедов, Тәжікстан Премьер-Министрі К. Расулзода, Өзбекстан Премьер-Министрі А. Арипов, Армения вице-премьері М. Григорян, Қырғызстан вице-премьері Ж. Разаков қатысты.
Шағын құрамда делегациялар басшылары ТМД-дағы экономикалық өзара іс-қимылдың өзекті мәселелері бойынша пікір алмасып, ұйымдастырушылық сипаттағы бірқатар мәселелерді шешті.