В Атырау 0 
29 мамырда "Хабар" арнасында тікелей эфирде президенттікке үміткерлердің арасында дебат өтті. Бір жарым сағатқа созылған теле-дебаттың ұйымдастырылуына бюджеттен 41 миллион теңге жұмсалды.
Теледебатқа Қазақстанның қазіргі президенті, "Нұр Отан" партиясы ұсынған кандидат Қасым-Жомарт Тоқаев, "Ақ жол" партиясының кандидаты Дания Еспаева және "Ауыл" партиясының кандидаты Төлеутай Рахымбеков келген жоқ. Дебатқа Жамбыл Ахметбеков, Әміржан Қосанов, Амангелді Таспихов, Сәді-Бек Түгел, Тоқаевтың сенімді өкілі Мәулен Әшімбаев, Еспаеваны ұсынған "Ақ жол" партиясының төрағасы Азат Перуашев, Рахымбековтің орнына "Ауыл" партиясының жетекшісі Әли Бектаев қатысты.
Аталған теле-дебат үш кезеңнен тұрды. Бірінші кезеңде үміткерлер өздерінің сайлау бағдарламасын таныстырып, бір-біріне сұрақ қойды. Екінші кезеңде кандидаттар жүргізушілердің сұрағына жауап берді. Үшінші кезеңде кандидаттар сайлаушыларға қарата сөз сөйледі. Биыл Қазақстанда кезектен тыс президент сайлауы 9 маусымда өтеді.
Орталық сайлау комиссиясы жеті адамды президенттікке кандидат ретінде тіркеген. Айта кетейік, Қазақстанда тікелей эфирде өткен теле-дебат осымен екінші рет өткізіліп отыр. Бұдан бұрын 2005 жылы өткізіліп, сол кездегі президент әрі президенттікке үміткер Нұрсұлтан Назарбаев қатыспаған еді.
Дереккөз: "The Qazaq Times"