Шіріген жұмыртқа иісі тек бізде емес екен

«Қазгидромет» Қазақстан қалаларындағы 2018 жылғы ауа сапасының бақылау қорытындысын жариялады. Атмосфераның ластануы жағынан Атырау қаласы екінші орында тұр екен, ал бірінші орын Өскемен қаласына бұйырған. Шығыс Қазақстан облысының әкімшілік орталығында бір жылда 1530 ең жоғарғы және 64 экстремалдық жоғары ластану оқиғасы орын алған болса, мұнайлы астанада бұл көрсеткіштер, сәйкесінше, 1102 және 177-ге жеткен. Батыс пен Шығыс аймақтарын байланыстыратын тағы бір нәрсе – екі қаланың тұрғындары да күкіртсутегімен уланып отыр.

Атырауда газ шабуылдарының себебі анықталды, бұл - Сасықсай булану алаңы. Өткен жылы 28 сәуірде «Вест Ойл» бақылау станциясы улы газдың ең жоғарғы концентрация көрсеткішін тіркеді. Ол ШРК-дан 133 есе көп. 

Өскеменде мұндай көрсеткіш 23 ақпан күні тіркелген, яғни, 126 ШРК-ға жеткен. 

Көбіне Қабанбай батыр және Питерские коммунары көшелеріндегі өскемендіктер шіріген жұмыртқаның иісі шығады деп шағымданады. Әйтсе де, сол жердегі билік оның себебін әлі күнге дейін анықтамаған. Күкіртсутегі – металлургиялық газ емес деп уәж айтқан «Казцинк» және «Май» акционерлік қоғамындағылар бұған еш қатысымыз жоқ  деп отыр. «Май» АҚ-қа салынған миллиондаған экологиялық айыппұлды сот алып тастады. 

Мұрат СҰЛТАНҒАЛИЕВ