В Атырау -4 
Қазақстанның 11 өңірінде науқастар өздеріне тиесілі дәрі-дәрмекті алмаған. Бұл туралы бүгін Орталық коммуникациялар қызметіндегі баспасөз мәслихатында ҚР Денсаулық сақтау министрлігі Фармация комитетінің төрайымы Людмила Бұйрабекова айтты, деп хабарлайды ҚазАқпарат тілшісі.
"Бір жыл бұрын, 2018 жылдың наурыз-сәуірінде министрлік тарапынан мониторинг тобы құрылды. Аталған шара пациенттер тарапынан министрлікке сатып алу процесі жүргізілгендігіне қарамастан дәрі-дәрмектерді ала алмауларына қатысты көптеген шағымның түсуіне байланысты жүргізілді", - деді ол.
Комитет төрайымының дерегінше, еліміздің 11 өңірінде 2016-2017 жылдарға арналған 4,3 млрд теңгенің дәрі-дәрмегі пайдаланылмай қалып қойғандығы анықталған. Ал дәрі-дәрмекпен қамтамасыз етудің бірыңғай ақпараттық жүйесінде аталған дәрі-дәректер науқастарға берілгендігі көрсетілген.
"Мониторинг топтың барлық мәліметтері Бас прокуратураға берілді және өткен жылдан қазіргі уақытқа дейін өңірлерде де, министрлікте де тексеру жүріп жатыр. Осы тексерулердің қорытындысында 20-дан астам қылмыстық іс қозғалды", - деді Людмила Бұйрабекова.
Дереккөз: inform.kz