​Иран мәжілісі АҚШ-тың үстінен Халықаралық сотқа арыз түсірді

Иран Ислам Республикасының мәжілісі ДАИШ террористік ұйымының 2017 жылы Теһранда (Тегеран) жасаған шабуылдары үшін Халықаралық сотқа АҚШ-қа қарсы талап түсірді, деп хабарлайды FARS агенттігі Иран мәжілісінің депутаты Аболтфази Абуторабидың сөзіне сілтеме жасап. 

Депутат Абутораби АҚШ-тың қазіргі президенті Дональд Трамптың кезінде сайлауалды науқанда Демократиялық партиядағы бәсекелесі Хиллари Клинтонның Ислам мемлекетінің құрылуына қатысы бар деп айтқанын еске салды. 

«Трамп сайлауалды науқанда сайлаудағы бәсекелесі Х. Клинтон ханымның АҚШ-тың ИМ-тін құрғаны туралы айтқанын ашықтан-ашық баяндады. Бұл мәселеде АҚШ президентінің сөзінен өзге тағы қандай айғақ болсын », - деп мәлімдеді. 

Осы жағдайға қатысты Иран мәжілісі Халықаралық сотқа АҚШ-тың үстінен арыз  түсірді. 

Еске сала кетсек, былтыр, 2017 жылдың 7 маусымында Иран парламентінің ғимаратына белгісіз топтар оқ жаудырған еді. Дәл осы күні Теһрандағы Хомейни имамның мазарына да шабуыл ұйымдастырылып, ақыры бұны істеген ДАИШ содырлары екені анықталған болатын.   

Дереккөз: “The Qazaq Times”